E representantenan di CEDE ARUBA y FCCA a firma un acuerdo di colaboracion cu ta dura cinco aña. E meta di e acuerdo aki ta pa fortalece e programanan existente den bario y mehora e servicio- y facilidadnan pa e residentenan. E firma di e acuerdo aki ta un paso grandi den e direccion corecto pa un futuro mas prospero pa nos barionan.
CEDE ARUBA, ta un organisacion di desaroyo y financiamento ariba tereno social y desaroyo sostenibel, cu ta enfoca su energia y recursonan pa promove avance den nos comunidad Arubano. Recientemente, nan a lansa un plan ambicioso dedica na desaroyo di bario, den cual nan lo sostene organisacion y iniciativa di bario, y colaboracion entre e instancianan. E proyecto aki, a ricibi apoyo di varios centro di bario y ayudo financiero di gobierno di Aruba y mas partner financiero.
FCCA, na su turno, ta dedica su esfuerso riba e solucionnan pa e falta di casnan social na Aruba. Nan meta ta pa tur famia Arubano, particularmente esunnan cu ta enfrenta retonan grandi pa haya un cas, por conta cu un hogar. Pero nan vision ta bay mas leu; FCCA ta traha activamente pa mehora e calidad di bida den nan barionan, pa promove diversidad, y pa organisa e actividadnan cu por enrikece e bida di su residentenan.
Door di firma e acuerdo aki, CEDE ARUBA y FCCA a planifica pa traha hunto riba varios iniciativa. Esakinan ta inclui financiamento di e proyectonan den bario, desaroyo y mantencion di e facilidadnan recreativo den e barionan, y pa e comunidad en general. Nan ta buscando pa colabora cu otro organisacion cu tin e mesun vision, manera IBiSA, FFD, y varios NGO’s, y e departamentonan di gobierno, cu e meta final pa contribui na mehoracion di calidad di bida y desaroyo di e barionan mas sano, inclusivo y uni.
Esaki ta un paso grandi den e caminda pa creacion di un futuro mas prospero pa nos barionan y nos comunidad. E acuerdo entre FCCA y CEDE ARUBA no solamente ta refleha nan dedicacion y compromiso, pero tambe e potencial grandi pa cambio positivo. Nos por mira dilanti cu confiansa y speransa, sabiendo cu e organisacionnan aki ta trahando activamente pa construi un Aruba mas fuerte y uni.
