Si tur cos tabata bon, diahuebs ultimo Eugene Lampe di 42 aña di edad lo mester a sali for di prizon. Esaki debi cu el a sinta ⅔ parti di su castigo caba. Pero salida di e preso specifico aki a causa bastante angustia y susto bou di su famia, pero tambe bisiñanan na Macuarima. Nan ta sinti cu nan bida lo no ta sigur mas debi na presencia di Eugene Lampe memey di nan. A manda carta y expresa na autoridad nan preocupacion.
A pone su V.I. “on hold”
Mester menciona cu e expresion di preocupacion a yega unda e mester a yega pasobra diahuebs atardi mes un decision a cay den Centrale Raad voor Reclassering. Nan a dicidi di prolonga e periodo di castigo y no otorga e “VI” ainda. Esaki pa por lo menos dos luna mas. Lo evalua e preso regularmente, prome cu dicidi di lag’e sali di prizon of dicidi di mantene cera pa mas tempo tambe, aplicando otro metodonan huridico, sea penal of di salud publico.
E caso mes
Tabata un diabierna, dia 4 di april 2008, cu Eugene Lampe, cu e tempo ey tabatin apenas 29 aña di edad, a comete triple asesinato na su cas na Macuarima, Santa Cruz. El a mata su tata Juan di 60 aña, su mama Ina di 57 aña y su ruman homber Edvard di 30 aña. Tabata un asesinato cu a conmove henter comunidad. E acusado, ora cu a trata su caso na januari 2009 a conta hues cu el a mata su famia pasobra e tabatin miedo cu nan lo pon’e bou di curatela. Fiscal a pidi bida largo p’e, pero hues a conden’e na 18 aña di prizon. Husticia a apela y a bolbe pidi bida largo pero tres hues for di Caribe Hulandes no a bay di acuerdo cu e demanda y a djis subi e castigo di 18 pa 20 aña di prizon.
Awor, como cu el a sinta ⅔ parti di su castigo, esta algo mas cu 13 aña, cu e ta bin na remarca pa libertad condicional. Via Centrale Raad voor Reclassering a logra pa no aplica voorwaardelijke invrijheidstelling (V.I.) p’e, sino di want’e den KIA debi na temor cu por ripiti e acto y causa panico den comunidad. A prolonga su detencion den KIA pendiente investigacion y conseho psikiatrico riba su condicion. Mester bisa si cu no tin keho riba su comportacion den KIA, incluso e ta hasta traha boluntariamente den biblioteca di KIA. Eugene ta bon studia y tabata hasta bay IPA pa bira meneer di scol. Na caminda el a “drop out” y a tuma caminda robes den bida, cu a conducive, hunto cu su enfermedad schizofrenia, pa comete un atrocidad cu dificilmente su famia lo por pordon’e un dia.
Pa e relato completo, lesa TREMPAN awe.
