Dia 22 di Februari cu a pasa, a cumpli 6 aña cu e Colombianonan Alcides Peralta y Benjamin Castro a perde nan bida, despues cu un tiro a laga bay accidentalmente for di arma di candela di un agente policial, sigui pa e resto di e miembronan policial presente automaticamente a los tiro riba e vehiculo ocupa pa e dos personanan aki, siendo, cu segun investigacionnan haci, no tabata arma.
E proceso huridico aki tabata uno largo pa e famianan, kendenan ta spera cu pa e aña aki, e dos casonan cu nan a entama, tanto civil como penal, wordo resolvi.
E luna aki decision den e caso civil mester cay y pa banda di luna di Juni, veredicto mester wordo dicta riba e otro caso penal.
Inicialmente a cuminsa cu un caso civil, caminda cu e veredicto den prome instancia, a sali na nan fabor, caminda cu ta reconoce cu tabata tin fayo den e accion policial aki, mescos cu tabata tin decision caminda cu hues a reconoce algun indemnisacion di tipo material y no material. Ademas di algun gasto di entiero cu e famianan tabata tin den e proceso pa repatria e restonan mortal.
Corte di casacion
E caso actualmente ta den corte di casacion na Hulanda y prome cu fin di e luna aki ta spera un veredicto. Esaki mester a cay na December ultimo, per nan a suspende te cu luna di Maart.
Compensacion
Famianan a pidi semper un indemnisacion moral, pero no a ricibi oido di gobierno di e tempo ey. tampoco nan no a ricibi un disculpa publico y formal di parti di un representante di nan, unda cu nan ta acepta cu fayonan a tuma luga durante e accion policial. Segun yiu di Alcides Peralta, Angelo, e prome minister Mike Eman, a haci un disculpa pero cu porta cera. Peralta ta sinti cu un disculpa ta na su luga. Tambe e famia ta spera un indemnisacion economico, mirando cu ambos persona, tanto Alcides como Benjamin a muri na un edad relativamente hoben y cu nan morto, a laga di produci recursonan economico pa mantencion di nan famia. Esaki ta wordo evalua pa asina determina un indemnisacion material.
Famia
Mientras tanto, Peralta y Castro a laga yiunan menor di edad atras, cu awendia ya casi ta birando mayor di edad. E famia riab su mes a confronta diferente problema no solamente financiero pero psicologico y ta spera cu awo pronto, esaki por pone un final na e capitulo scur cu tin den nan bida.
