Alex Matthew, consehero legal di famia di Chania Fernandes Pedra, a tene un conferencia di prensa pa expresa e preocupacionnan tocante e manera cu e proceso hudicial di Chania ta conduci. Segun Matthew, e famia ta cuestiona principalmente e falta di un abogado permanente pa representa Chania y ta pidi mas transparencia den e proceso.
Matthew a declara cu e famia a ripara discrepancia entre loke ta papia durante e sesionnan den corte y loke ta aparece despues den e proces-verbaal. Segun su relato, e situacion ta haci importante pa prensa y abogado por tin acceso na grabacionnan di e audiencianan, por lo menos na forma di audio, pa por tin un registro exacto di loke ta bisa.
E consehero di famia a relata tambe cu Chania a pidi un abogado desde e momento cu el a presenta den corte. Segun Matthew, e caso ta programa pa diferente fecha, mientras cu e defensa ainda no tabatin un abogado cu por prepara adecuadamente e caso.
Matthew a cuestiona tambe un afirmacion segun cual dos abogado di Corsou lo tabata dispuesto pa representa Chania. El a bisa cu, despues di contacto cu e abogadonan menciona, a resulta segun su version cu nan no tabata na altura di e caso n’e momento cu nan nomber ta menciona.
Segun Matthew, un otro abogado a tuma contacto cu Chania via video conferencia solamente un dia prome cu e audiencia di 2 di october. E situacion, segun e consehero, ta genera preocupacion pasobra un abogado mester tin suficiente tempo pa conoce e dossier y prepara un defensa.
Facebook live link: https://www.facebook.com/share/v/19kjhM9MXQ/
Matthew a enfatisa cu e famia no ta pidi pa Chania ta trata diferente, sino p’e por haya un oportunidad real pa defende su mes y pa su derecho na asistencia legal ta respeta. Hasta tabata momento unda e abogadonan no kier tuma e caso, debi cu nan ainda no tin acceso na tur e documentonan di e expediente. P’e caso por sigui, tambe mester realisa un reconstruccion di e accident, algo cu te ainda no a tuma luga. Aruba no ta conta actualmente cu e specialistanan pa realisa e reconstruccion, y pa esaki mester pidi asistencia di e specialistanan for di Hulanda. Te awor, esaki no a tuma luga.
