Rulienne Arends ta di Fundacion FADA. Durante e conferencia di prensa di Salubridad el a splica y comenta riba e mensahe di Amigo Didi. Cualkier evento cu bo bay y bo ta bay bebe, percura pa bo tin un amigo Didi pa stuur pa bo.
El a comenta cu FADA ta contento cu por a join e campaña di Carnaval 65. FADA tin hopi opcion kico lo kier trece dilanti den comunidad. Pero un campaña sigur cu mester tey presente durante e temporada aki, ta e campaña di #AmigoDidi, unda hunto cu fundacion Zinnia, kier pa e campaña aki ta en grande, pa loke ta Carnaval 65.
Pesey tambe, ta hopi contento cu por a join cu e campaña di Salubridad Publico na unda cu no solamente Amigo Didi lo tey presente den forma di e sticker cu ta hopi popular durante e temporada aki, na unda cu a cambi’e, mirando cu ta e peticion di comunidad mes. Pero e enfoke no ta djis pa bo haya sticker y pon’e riba bo auto, pero tambe pa corda kico ta e mensahe di #AmigoDidi. E ta hopi importante pa tur hende compronde cu na momento cu ta bay un evento di Carnaval, sea ta un parada, un eleccion di reina, ki evento cu e por ta y bo sa cu bo ta bay usa alcohol, bo ta bay bebe, djis tin un Amigo Didi cu lo por stuur.
Hunto cu Fundacion Zinnia, ta bin ya caba dos aña ta dunando diferente opcion, den ki manera por haci’e. Teniendo na cuenta cu no ta bisando ningun hende no, no bay bebe alcohol.
Pero kier pa ta conciente den ki forma bo ta bay haci’e y corda cu tin otronan cu a caba di traha, cu ta bayendo cas. Hopi facil, cera un grupo di amistad y bisa, cu pa e weekend aki di Carnaval, uno lo no bay bebe alcohol y percura pa tur hende yega cas sano.
E siguiente fin di siman un otro hende lo bay haci esey, teniendo na cuenta cu uso di alcohol tin su consecuencianan adicional na bo salud. Pero pesey kier pa Amigo Didi tey den e campaña aki hunto cu diferente otro fundacion. Di parti di FADA, ta bay drenta tur e scolnan, vooral secundario, pasobra no ta solamente adultonan mester haya e informacion, pero tambe nos hobennan. Ta e temporada unda cu ta wak hobennan riba caya cu alcohol y no ta para keto un rato y pensa kico ta e consecuencia pa nan, no solamente corto plazo, pero tambe den largo plazo.
Rullienne Arends di FADA a splica cu ta pesey tambe kier duna informacion hunto cu diferente fundacion. Nan lo bay bin cu e carousel, cu lo join e campaña hunto cu e otro fundacionnan.
Tambe lo laga esaki den man di Fundacion Zinnia, pa loke ta e campaña di #AmigoDidi. FADA kier duna e mensahe no solamente na e adultonan pa no core bao di influencia, cu como adulto, abo ta e ehempel pa e hoben.
Si un hoben ta wak cu bo ta gewoon bebe bo alcohol y no ta worry con hopi bo ta bebiendo, bo ta bay subi e auto y bo ta bay stuur, e hoben aki ta bay haci mesun cos cu abo como adulto ta haciendo. Tene na cuenta cu bo ta e ehempel. Como mayor, sa cu abo ta responsabel si bo yiu ta bay den un evento, e ta bay den un grupo, abo ta responsabel pa wak den ki grupo e ta bayendo.
Arends a splica cu for di tempo di #AmigoDidi a cuminsa, por wak cu tiki tiki ta canando bon. E ta tumando babysteps, pa e por crece. Pero por wak sigur cu e ta yudando.
Hopi biaha ta mira cu hendenan ta tag FADA y Fundacion Zinnia riba Facebook, unda cu nan ta mustra cu nan a sali, pero nan tin nan Amigo Didi. Tin hende cu semper ora nan sali, nan ta cambia ken ta su Amigo Didi.
Na e scolnan e hobennan ta menciona Amigo Didi hopi tambe. Ta hopi contento di wak cu e automobilistanan tin hopi sticker toch rond cu e #AmigoDidi y esey ta loke FADA kier wak. Nan kier pa e ta mas eyfo pa e hendenan corda riba e campaña cu nan tin pa algun aña caba.
