Eddie Croes ta ex politico y tabata presidente di Parlamento den decada a sigui e situacion actual, unda cu 10 parlamentario a entrega mocion di desconfiansa contra Minister Marisol Lopez-Tromp. Desde 1998 pa 2001 e tabata den Parlamento y e reglanan a keda mescos, no a conoce un cambio den reglamento di ordo y constitucion pasobra e principionan t’ey ainda.
Di mira loke ta pasa na Aruba, Croes ta pensa di biaha riba e palabra integridad, pero no ta solamente bin cu un camara di integridad, no bin solamente cu ombudsman of financiamento di partido politico. Ta e personanan cu ta actua continuamente mester tene na cuenta cu tin reglanan existente y cumpli cu ne 100%. Unabes no cumpli cu e regla, ta actua contra e regla di integridad.
Tin e punto di bon gobernacion, pero loke a pasa den Parlamento unda cu parlamentarionan a bandona e sala y voto a cay, ta un situacion no legal pasobra e reglanan ta bon cla. Tin reglamento di ordo den Parlamento y den articulo 27 ta bisa na e momento cu no tin quorum mas den Parlamento, esta di no tin bastante miembro den Parlamento, pa tuma decision e presidente no por continua cu e reunion. Loke cu mester a haci ta menciona nomber pa nomber y constata cu no tin diesun miembro mas den Parlamento, di cual tin di pospone e reunion. E presidente por yama bek e reunion dentro di cuater dia di trabou pa delibera e puntonan ora cu tin mas miembro di Parlamento.
E votacion no ta legal y e ta poni den constitucion, cu ta bisa di no por tuma decision den Parlamento si no tin diesun hende. E resultado di 10-0 no ta un resultado valido, Croes a bisa. Presidente di Parlamento a bisa di un palabracion haci cu nan por sigui na cierto manera, pero e no ta cuadra y no ta corecto. E reunion a cuminsa na e sistema tradicional di semper, cu tur miembro di Parlamento tabata presente. No por cambia un reglamento di ordo cu un palabracion asina, pero por haci cambio di reglamento di ordo di cual tin cierto procedemento. Nan no a sigui e procedemento pasobra mester a public’e p’e cambionan por tin forsa.
Croes a indica cu e rol di Gobernador ta pa duna conseho. E tin hende cu ta conseh’e riba tereno constitucional y nan lo duna conseho corecto. Gobernador lo sugeri na tur hende pa coregi e situacion aki na e manera miho posibel. Presidente di Parlamento tin di yama un reunion bek pa continua cu e reunion unda el a keda y percura pa tin mas cu diesun persona den sala pa trata e decisionnan cu meter tuma ainda.
