Un biaha mas e cantante, cu e bos di seda cual ta caracteris’e, ta lansa un produccion nobo acompaña pa e briyante gitarista di Kompa di nacionalidad Haitiano Canades Micheal Henry como tambe riba drum ex miembro di banda Intwine Rocheteau Mahuwallan.
Titulo di e cancion ta “Visions of Love”
Produccion a keda den man di e Hulandes-Surnameo y super producer Kris Salvathore (Damian Marley, Chris Brown, Yellow Claw). Pa reenforsa stem den e produccion a bin adicional cantante Angela Vergouwen cu letra y melodia cu Grayham a encarga di dje.
Remarcabel ta e echo cu ningun di e musiconan aki a conoce otro en persona pa motibo di e pandemia di Covid-19, pero mester bisa cu e pandemia a yuda inspira e produccion si.
Grayham ta corda cu na momento cu e pandemia a presenta den Europa den luna di maart, a duna oportunidad pa e cu su pareha por a acerca otro mas durante e lockdown. A raiz di esaki Grayham a propone matrimonio na su pareha y a pone un fecha caba pa e enlace matrimonial.
Patrick Grayham ta un Sony/ATV singer-songwriter di nacionalidad Hulandes Caribense. Su musica ta un fusion di ritmonan caribense acompaña pa guitara y stemnan suave como realse.
Algun di su exitonan cu ta mas renombra ta e hit “Fire”,”Bolbe” y “Pretty Girl” cual a yega den posicion halto riba top tanto den Caribe como Suriname y Hulanda.
Ademas di compone su propio cancionnan, Grayham ta brinda su talento pa compone pa otro artistanan tambe. Manera “Shot Gun” di Yellow Claw cu ta certifica cu cuatro titulo di platino. Na aña 2016 Grayham a ricibi e premiacion Buma pa su meritonan como un compositor renombra.
