Corte di Casacion na Hulanda a confirma e sentencia di Corte Comun di Caribe Hulandes, cu a condena ex Minister Presidente Gerrit Schotte y su pareha, pa corupcion y labamento di placa. E castigo di prizon di tres aña ta keda definitivo tambe!
Den e veredicto contra Schotte, e crimen “ambtelijke corruptie” ta central. Corte a haya cu tin suficiente prueba cu e Prome Minister tabata ricibi regalonan, consistiendo di sumanan halto di placa, for di un amigo comerciante Italiano, pa e regla asunto pe. Pa por legalisa e sumanan di placa ricibi, el a laga traha facturanan/recibonan falso.
Tambe, den bista di e Huesnan, tanto e sospechoso Schotte como tambe su pareha, a haci man mes culpabel na labamento di placa. A haya nan uzando “frequency jammers” pa nan celularnan, asina stroba cualkier intento di scucha nan yamadanan. Esaki ta duna mas motibo ainda pa pensa cu ta envolvi den asuntonan cu no mag di mira luz di dia.
A condena Gerrit Schotte cu tres aña di castigo di prizon. Como castigo adicional, a impone cu durante 5 aña e no por participa den eleccionnan politico na Corsou. Su pareha a haya castigo di 15 luna di prizon pa labamento di placa, di cua 6 ta condicional, pues lo mester sinta 9 luna so. Ambos sospechoso no a keda satisfecho cu e sentencia di Corte Superior y a haci uzo di nan derecho pa bay na e ultimo recurso, Corte di Casacion na Den Haag.
Den e prome aresto, Hoge Raad a para un rato keto na e kehonan den casacion, contra e uzo di pruebanan pa e acusacion di corupcion. Schotte ta bisa cu e sumanan di placa ricibi no tabata pa cumpr’e, sino tabata placa pa recauda fondo pa funda su partido politico nobo. Den esey e Huesnan a bisa e ex mandatario cu si ta pa lanta su partido politico, cu esey tambe ta un regalo y esey tambe ta ilegal! Corte di Casacion ta considera cu dunando e sumanan halto aki di placa, cu e donante ta crea e percepcion cu e lo haya un trato preferencial na momento cu Schotte ta den Gobierno. Hoge Raad como tal no ta haya e ponencia di Corte Superior malo den esaki, pues nan tambe ta pensa mesun cos.
Tambe, demas kehonan cu a entama contra e sentencia di Corte Comun di Caribe Hulandes (Corte Superior) no a conduci na Corte di Casacion pa elimina e sentencia. Como tal ambos sentencia y castigo ta keda definitivo!
https://www.facebook.com/10150312484370001/posts/10161582543720001/