Esaki ta locual un comunicado oficial di e partido a menciona den oranan laat di awe nochi. E decision ta indicacion di problema den e cas cu Miguel Pourier a traha. Segun presidente di e partido Gerald Rag, Eugene kier dedica tempo pa rehubenese e partido geel, un fli cu kisas lo no subi den transcurso di siman.
PAR a lansa un splicacion den oranan di anochi cu no a capta atencion realmente. Segun e geelnan di Fokkerweg, cu regreso di Eugene Rhuggenaath den partido PAR, su punto di lansa tabata pa trece hoben profesional den partido PAR, cu por a reconoce nan mes den e ideologia di partido PAR.
Segun PAR, esaki ta un proceso cu Eugene Rhuggenaath a cuminsa hunto cu su directiva cual tabata bisto cu e lista, cu hopi cara nobo cu partido PAR a entrega na Conseho Supremo Electoral pa bay eleccion di 19 di maart ultimo.
PAR a sigui splica cu, Rhuggenaath kier pone enfasis detayadamente cu presentacion di e lista di candidatonan pa eleccion, cu directiva tin cu sigui cu e proceso di transformacion y rehubenece partido PAR, formando lidernan pa futuro y pa e proximo eleccion, cu lo ta na aña 2025.
Basa riba resultado di eleccion ultimo y un presentacion preliminar di un comision institui door di directiva pa evalua partido y e resultado obteni, nan lider politico Eugene Rhuggenaath a y ta sinti su mes yama pa ta esun responsabel, pa dedica su mes na e proceso entama pa reforma y restructura partido PAR preparando pa e siguiente eleccion.
Rhuggenaath lo inclui tambe su guia y sosten na fraccion di PAR den parlamento unda PAR lo hiba un oposicion constructivo y critico pa un miho Corsou den e momento dificil cu nos dushi pais ta pasando aden.
Basa riba e puntonan menciona, Rhuggenaath a dicidi pa tuma e proceso di transformacion, reformacion y restructuracion den su calidad di lider politico pa haci PAR e alternativa real pa e proximo eleccion. Motibo pa cual Rhuggenaath lo no huramenta pa drenta parlamento. E noticia mesora a lanta speculacion den arena politico, alegando posibel problemanan interno, aunke a desmenti esaki mesora.
