Awe e cantidad di casonan relaciona cu COVID-19 ta na 704, pero diariamente ta mira un aumento di 60 caso postivo. Esaki ta un situacion grave y esey ta algo preocupante.
Un di e decision tuma caba ta di hospital. Nan a dicidi di para e cuido regular haci den hospital, pa por crea mas capacidad di cama di COVID. Esaki ta pone di un banda pashentnan cu ta en espera p’un tratamento, tin cu warda un tiki mas. Di otro banda ta crea espacio pa sigui brinda cuido na pashentnan di COVID, kendenan ta luchando cu nan bida den hospital.
Debi na e casonan halto, a pone cu nan mester a tuma un otro decision en cuanto comercio. Wever-Croes a expresa cu nan a tuma e decision aki pa cera comecio riba diabierna diadomingo y dialuna. Anteriormente Ministerio di Economia a anuncia cu e fechanan aki nan tabata di habri, pero e desaroyo di ultimo dianan di 704 caso, 60 caso nobo pa dia, hospital ta hopi yen y esey tabata e preocupacion.
Tur esaki a conduci cu pa garantisa cuido di salud di un y tur, mester cera e dianan menciona. Den e caso aki tin exepcion pa laga cierto establecimento habri, cual ta casino, tiendanan den hotel y demas den horeca, restaurant, pumpstation y botica. E ta pidi comprension di sector comercial riba e desicion dificil, pero cu ta uno necesario.
A cera establecimento comercial, p’esey ta pidi comunidad pa no bay den aglomeracion otro caminda y restringi y limita salimento. Esaki ta pa evita cu e virus ta sigui plama mas. Wever-Croes ta recorda tur hende cu e medidanan anuncia siman pasa ta keda na vigor te 11 di april. Esaki ta pa frena e cantidad di contagio y no a yega na un pik, pero tur esaki ta pa yuda yega na e meta pa frena cantidad di contagio. E medidanan cu ta na vigor di toque de queda ta cuminsa 10:00 pm pa 5:00 am, gebiedverbod ta cuminsa 7:00 pm cu no por ta na luga publcio, samenscholingsverbod di maximo 2 persona, prohibicion di alcohol riba caminda publico cu ta conta pa henter dia. Ta spera cu e medidanan aki ta pa frena e cantidad di persona den luganan publico.
Actividad politico tambe ta cay bou di e reglanan aki cu ta vigente te 11 di april. Cuerpo policial y Crisis team lo sinta cu partidonan politico pa mira con ta bay haci p’e temporada di eleccion. E casonan di COVID-19 ta bin di e comportacion iresponsabel di dia 18 di maart. Tabatin hopi aglomeracion riba e dia ey, p’esey no kier p’e bolbe pasa cu aki dos siman tin hopi caso di contagio debi na e fin di siman aki.
