Investigacion den AVB pa “valsheid in geschrifte”

Recientemente e organisacion di futbol, Sport Vereniging Racing Club Aruba, SV RCA, a entrega un keho oficial relaciona cu un procedura cu a tuma luga na Arubaanse Voetbal Bond (AVB). Mesora a start un investigacion interno pa verifica con e procedura a bay, esunnan envolvi y revisa e normanan y reglanan interno pa evita ripiticion.

Ta trata aki di un firma cu e Secretario General a pone na luga di SV RCA. E ekipo ta denuncia cu esey ta “valsheid in geschrifte”, pero despues di evaluacion AVB a consider’e un eror humano y a disculpa na e ekipo. Pero asina mes, SV RCA a opta pa paralelo cu e investigacion interno, tambe a start un procedura penal door di entrega keho na recherche. Mester aclaria si cu aki no ta trata di ningun procedura financiero of cu tin di haber cu placa. E ta mas bien un procedura di inscripcion cu SV RCA ta keha di no a cana corecto. 

Reginald “Reggie” Geerman ta secretario general di Arubaanse Voetbal Bond pa algun tempo caba. E ta na cabes di e maneho diario di e operacionnan di e fundacion. Ta un persona cu a bini for di Banco Central y tin un carera impresionante den e sector financiero. Sinembargo, diaranson ultimo polis a detene pa falsificacion pero a lag’e den libertad awe tardi. No ta conoci ki medida disciplinario AVB mes a tuma contra dje pa e “eror humano” cu el a comete aki.

Arubaanse Voetbal Bond ta un organisacion cu no ta haya sosten financiero di gobierno, sino di FIFA y CONCACAF. Anualmente dos compania di accountant reconoci ta audit e cifranan di e organisacion. Tin sistemanan di control estableci pa garantisa cu cada gasto realisa, ta pa yuda desaroya y engrandece futbol riba nos isla. 

Noticia relacionaMas for di e autor