Recogemento y maneho di sushi ta den discusion pa algun luna caba. Diariamente tin reaccion riba esaki. Ta puntra si ta posibel pa inclui e gasto aki den e “crisis heffing”. Prome Minister Evelyn Wever-Croes a splica cu awor Gobierno ta bay bin cu un solucion pa e problema di sushi mes na Parkietenbos. Si tabata manera aña pasa, cu ta wordo pidi como pueblo, pa paga pa piki sushi, ta keda crea un calamidad di medio ambiente na Parkietenbos y riba henter Aruba, e ora ta bisa cu pakico tin cu paga y no ta haci nada.
Na e momentonan aki tin tecnologianan cu tin cu wordo implementa, gastonan grandi cu tin cu bay haci. Pero e compromiso ta pa atende cu e problema cu tin di sushi y pa para e molester cu tin na Parkietenbos pa tur e area y esunnan cu ta biba eybanda. No pa nan so, pero pa henter Aruba.
Tur e candela y e huma cu ta haya, tin biaha for di e sero di dump eynan, no ta normal. E ta un calamidad ecologico cu nos ta creando. Den e cuadro ey, ta yega momento cu mester pidi solidaridad na comunidad. Pero naturalmente na e momentonan aki ta papiando di Crisisheffing y tambe e crisis cu e Gobierno ta aden.
E Prome Minister a sigui e discusion y tin un combersacion pendiente cu Minister Otmar Oduber riba e tema aki, specialmente pa e wordo miho informa kico ta loke lo bay haci, con lihe lo bay para e estorbo, e molester cu tin na Parkietenbos. Kico ta e gastonan envolvi completamente cu esey y mira con ta para pe.
“Na e momentonan aki, cu e crisis cu nos ta aden, no tin e fondonan adicional pa yega na soluciona e problema y e no ta un problema cu nos por sconde”, segun Minister Presidente Wever.
E ta den deliberacion y lo sigui papia di esaki, pa mira con ta trece alivio den esaki. Tarifanan social, socialisa e tarifa, etc. Tin hende ta bisa cu no tin problema pa paga, pero no kier paga e suma completo. Otro ta bisa cu no tin problema pa paga, pero depende con ta bin cobr’e. Tin hende ta bisa cu no tin problema pa paga, pero basta cu nan mira cu algo ta wordo haci riba e tereno aki. Gobierno ta teniendo cuenta cu tur e argumentonan aki.
Di un otro banda por a tende for di gobierno cu e proceso pa yega na un forma nobo pa atende cu sushi na Aruba y pa loke ta trata dump, a tuma luga den oficina di notario Johnson.
E RFI cu a wordo saca, uno, pa loke ta e maneho di desperdicio con pa cera e dump y kico pa haci cu e sushi, companianan cu ta dispuesto pa bid aki na Aruba, den un destaho publico. Un total di 20 compania a participa y tres compania local cu partnernan den exterior a participa.
E planeamento ta con lo por cera dump y kico lo wordo haci cu e maneho di e sushi, unda un total di 20 companianan a entrega un peticion incluyendo companianan local cu a wordo inscribi y tambe companianan grandi for di exterior cu kier participa den proyecto aki di Parkietenbos pa haya e licencia di RFI number 1 pa traha riba e maneho di desperdicio.
RFI number 2 a wordo haya tambe otro 14 compania grandi unda cu algun di esakinan lo a inscribi na e dos proyectonan pa traha den forma simultaneo cu tur dos proyecto, pa loke ta e tecnologia cu nan kier implementa pa coregi e problematica na Parkietenbos.
Tur e companianan aki lo wordo evalua den parti Tecnichal Comitee unda lo haya e rapportnan di e 45 dianan cu nan a funciona, pa wak kico mester a haci na corto, mediano y largo plazo. Nan tin te dia 13 di April pa haci e evaluacion caminda cu na fin di April lo saca e destaho publico cu RFu, cu ta e request for quotation oficial unda na fin di Juni, lo selecta e companianan pa e 2 proyectonan di maneho di desperdicio y ceramento di Dump y e forma con lo wordo haci. Tur esaki lo sali for di e “request for quotation” cu lo sali fin di April.
Pa otro siman lo anuncia oficialmente kico lo sosode, na caminda ta yega aki 2 aña e tecnologia nobo aki cu lo wordo implementa y en todo caso lo bay anuncia cu dump ta bay wordo cera practicamente completo riba un 90% e operacionnan den e parti di desperdicio y sushi na Aruba y cu esaki lo wordo trata haciendo e analisis pa deposita esaki na paketenan den e subsuelo. Ta bezig tambe cu documentacion pa por traha cu un compania local, Ecogas den e caso aki, pa cuminsa tera e sushi na un caminda cu supervision di Serlimar tambe.
