Na Bushiri, mas of menos na altura di Fantastic Garden, a sosode un atraco diadomingo marduga. E tabata un atraco riba dos dama riba caya y a usa arma di candela. Durante e atraco a bay cu pertenencia di e damanan atraca.
Polis a wordo avisa y nan a yega mesora. Durante declaracion e victimanan a declara cu nan tabata sinta riba un piedra banda di Fantastic Garden, ora cu nan a nota un Toyota Tercel Shinishi pasa y a bira bek. Un homber a baha di e auto cu un arma di candela y a pidi pa nan tas y placa. A ranca e tas y e individuonan a subi bek den e auto, direccion zuid. E dos damanan a wordo hiba warda di Playa, unda cu atraco team a presenta pa tuma over e investigacion. Slachtofferhulp tambe a presenta pa duna e dos damanan aki asistencia. Mientras tanto a cuminsa un buskeda di Polis tambe pa e atracadornan. Durante buskeda Polis, na altura di e rotonde di Driemasterstraat a topa cu e sospechosonan. Aki a logra detene dos Arubiano y un Venezolano. A logra haya tambe un arma di candela den nan poder y ta e arma usa den e atraco.
Tambe e auto a keda confisca. Departamento di Atraco Team ta den full swing trahando riba e caso pa asina sigui saca mas informacion. E trabou di Polisnan di Playa y otro distritonan trahando hunto a duna su fruto mesora pa logra e detencion. Pabien na Cuerpo Policial. E weekend aki so a coy dos arma di candela relaciona cu casonan di atraco.
