Famia Planea tin 2 miembresia y por cumpra productonan los cerca nan. E miembresia cu nan tin principalmente pa hobennan ta cu nan carchi di AZV, di cual e seguro ta cubri e hoben te cu 21 aña.
E hoben por acudi cerca Famia Planea cu su carchi di AZV y e por bira miembro unda cu e por ricibi e metodo di anticonceptivo di su escogencia.
Evelyn Ras Yarzagaray, directora di Famia Planea, a expresa cu si e metodo di anticonceptivo manera hangua, spiraal cu e dokter di cas ta yama pa pone esaki, nan ta pidi principalmente un receta di dokter di cas. Asina cu nan tin esaki den file e hoben ta keda registra cerca Famia Planea y e por keda bishita nan cada pasa 3 luna p’e por haya consulta y producto desea.
Si e persona ta 21 aña bay ariba, Famia Planea tin diferente servicio cu por haci uzo di dje na un prijs reduci. Tin tur producto cu ta disponibel, diferente metodo anticonceptivo cu ta riba mercado cu adulto por uza na un prijs reduci. Esaki ta e manera cu no solamente e fundacion ta haya cierto fondonan pa pro sigui cu nan trabou. Tambe nan ta hinca esaki bek den comunidad, sea p’e aspecto anticonceptivo pero tambe proyectonan cu ta haci durante aña.
Tin proyectonan andando cu dokternan di cas, proyectonan na diferente scol, tin diferente servicio nobo cu a bin cu nan. Famia Planea tin alrededor di 8 servicio den 2018. E servicionan aki ta na un prijs hopi reduci y e ta duna nan bek e forsa financiero cu nan por hinca bek den proyectonan pa scolnan, campañanan den transcurso di aña. Tur esey ta yuda nan pa ta un tiki sostenibel financieramente, pasobra nan ta un organisacion cu ta traha den un area preventivo. No ta asina facil mas pa haya donacion, kiermen Famia Planea ta draai rond di 70% dependiendo di e fondonan di gobierno y 20% ta bin di nan mesun forsa. Alrededor di 5% Famia Planea ta depende di e federacion International Plan Parenthood, di cual pa motibo cu Aruba ta stabiel ta haya e 5% cu ta encera e metodo di anticonceptivo cu ta bin di Inglatera.
E productonan mas bendi ta e hangua di 1 luna y de pill, cual ta e metodo mas bieu di anticonceptivo. E ta e metodo hopi uza, sinembargo tiki tiki e hangua ta tumando over. Tin hoben y adulto cu ta prefera di bay over na inyeccion di 1 luna y esey ta haci’e mas facil pa nan corda. Hopi hende ta bay over na esey mirando nan estilo di bida.
E temporada di carnaval Famia Planea nan ta visibel, mirando cu aña den aña afo nan ta traha cu tur dokter di cas, e scolnan y nada no lo cambia, asina Evelyn Ras Yarzagaray a bisa. Nan ta haci esfuerso pa ta mas visibel eyfo, tambe p’e mayornan cu ta hunga un rol importante durante e periodo aki. Esaki ta e periodo di risico halto y Famia Planea ta gusta enfoca riba aspectonan positivo. Nan ta contento cu e acogida di comunidad henter e aspecto di responsabilidad. Nan ta mirando mas consciente, pero tin trabounan pa haci p’esey ta keda enfoca riba hobennan.
Tur hende por pasa momentonan dibertido, pero Famia Planea t’ey pa facilita cu tur guia y informacion necesario. Despues di e periodo di carnaval di biaha ta bay over na e periodo di campamento, semana santa. E ta un par di luna tra’i otro y tin e espacio cu hendenan por pasa momentonan agradabel. Famia Planea t’ey pa brinda informacion di e metodo cu ta necesario na e momento ey y tin diferente manera cu por yega na nan.
