Tin biaha por scucha hopi cos riba caya, cambionan di prijs, aumento, etc. Esaki sigur tin un efecto riba e restaurantnan.
Segun presidente di Aruba Gastronomic Association, Jan van Nes, definitivamente ta conoci cu Aruba ta caro. E cost of labor na Aruba ta caro. Prome cu e huespednan a drenta bo luga, pa bo break even ta un challenge.
Bo ta haya cu e mercado cu ta bishitabo a base di prijs, of a base di critica di prijs, ta haya cu Aruba ta caro.
Tin hendenan cu ta comparti un appetizer. Bo ta haya hende cu ta comparti un main dish. Bo tin hende cu ya no ta consumiendo bebidanan alcoholico.
Aruba ta caro y esey ta un preocupacion cu tin y con pa supera esey.
Cada dos luna e miembronan di AGA ta topa. Nan ta network y wak kico nan por haci. Nan ta cambia informacion cu otro. Pero mas importante ta cu e porta di parti di gobierno ta habri.
Luna pasa a sinta cu DPL. Tabata tin un reunion masha positivo cu prome minister y e director, como tambe minister di labor. Por mira cu pa por yega na solucion, tin cu papia na mesa. Van Nes ta contento cu te awor aki e ta mustra cu e portanan ta habri.
Diamars mes diferente asociacion a manda un carta pa prome minister, pa por a reuni y a haya un contesta diamars mesora, cu pronto e lo sinta. Ta contento cu e portanan ta habri y e forma di yega na solucion ta na mesa.
Siguiente reunion
Van Nes ta conta cu nan kier anticipa cu nan a haya seis luna pa implementa e reforma fiscal, cu BBO, BAZV y BAVP, pero nan ta conciente cu esey ta solamente fase 1.
Kier anticipa ya caba cual ta bay ta un sales tax, si lo bay tin uno y kier papia ainda over di e BBO, BAZV y BAVP, con ta afecta e restaurantnan y e persepcion cu lo a mira mas caro.
Esey un biaha mas ta spera di por lo pronto di sinta cu prome minister y minister di finansas.
Cambionan di prijs di bebidanan alcoholico
Van Nes a expresa cu biña a aumenta cu 8%, accijns riba licor a aumenta cu 40%. Hopi di e luganan por tuma e aumento di biña den nan prijs. Pero ta kere cu licor, e aumento aki lo causa cu diferente luga lo ta forsa of ta by hiba nan prijs cu alomenos 1 of 2 dollar pa liquor drinks.
Prijs ta caro
E cost of business cu ta cuminsa cu e cadena di cuminda, ta caro. A yega un momento cu bo no por aumenta bo prijs. Cada cu tin un aumento di prijs tumando luga, por bisa cu bo ta hala faha. Ta yega un momento cu ya caba bo clientenan ta keha cu bo ta caro, turistanan ta keha y bo no por pasa tur aumento pa e consumidor.
Esey ta haci cu e margen di ganashi di parti di e restaurantnan ta bira mas chikito y cu si bo kier sigui cu bo negoshi bo no por solamente aumenta prijs. Esey no ta e solucion.
Mas cambio
Turismo afortunadamente, te awor aki pa 2018 tabata uno bon. Januari a cuminsa bon. Tur por weita p’adilanti un season exitoso. Pero van Nes ta kere na e mes un momento cu e turistanan cu ta bin tambe ta adapta nan custumbernan cu kisas por gira cu nan por bishita menos restaurant y nan lo bishita mas supermercado.
E trend ey ta sintiendo caba, cu a base di Air BNB y Home vacations, bo ta wak hopi mas turista ta bishitando mas supermercado cu antes. Cada bes cu bay na e supermercado, ta hay’e cu hopi turista. Ta mira aki cuanto hende lo bay bishita e restaurantnan. E ta logico cu bayendo supermercado, tin su ahoronan pa nos turistanan, pero esey ta nifica tambe pa e restaurant, lo ta menos bishitante.
Mensahe Jan van Nes a comenta cu lo bay tin un impact study por lo pronto riba e industria di restaurant cu lo keda cla na Maart. Ta nifica e area di restaurant ta e di dos dunado di trabao mas grandi na Aruba cu casi 5000 empleado. Ta nifica alomenos un mey biyon di florin di benta, di cual 95% ta vloei bek den nos economia. E ta un sector importante. Toch AGA ta optimista, pasobra Aruba semper a sa di yega na solucionnan y semper a sobrevivi retonan cu tabata tin y esey tin cu vocifera cu e otro asociacionnan y cu gobierno pa yega na solucionnan cu ta a largo plazo, cu lo bay cumbini nos tur.
