Aruba lo conoce un pelicula nobo cu ta hiba e nomber di Tierras Calientes produci pa Angel Soto, anticipando estreno di e produccion nobo a combersa cu Arnalda Lampe kende tin un rol den e pelicula como “agente secreto Cristy”.
Lampe a relata cu preparacion pa produccion di e pelicula a bay basta lihe, director di e pelicula Angel Soto a acerca Lampe su persona pa su participacion den e pelicula. Algun parti di preparacion tawata encera lesa e script pa por a adapta na e personahenan, realmente e tin tres rol den e pelicula.
E produccion di e pelicula a bay basta lihe, a pesar cu Arnalda no ta biba na Aruba. E mester a biaha bay y bin tuma dos luna y mei pa tin tur cos filma pa edit.
Riba su mes e produccion di e pelicula a bay basta lihe. A graba varios biaha durante cu e actriz tawata biaha bin Aruba, mirando cu e ta bibando den exterior.
Actuacion pa un pelicula no ta un arte desconoci pa su persona, mirando cu e la actua den e prome pelicula “Blackout”, e tin un bon relacion di trabao cu e director di pelicula Angel Soto di hopi aña, for di tempo cu tawata produci programanan di television.
Soto a relata cu e idea pa e pelicula “Tierras Calientes” a cuminsa entre 5 pa 6 aña pasa, den marduga ora cu el a cuminsa skirbi e storia riba cuater napkins.
No tawata facil pa haya financiamento pa e pelicula. Su tras a bin e pandemia cu a haci e situacion mas dificil pa haya sponsor pa cual a opta pa bay focus prome riba e estreno di e pelicula “Blackout” na 2022 y despues cu a logra financiamento a bolbe pa sigui cu preparacion di “Tierras Calientes.
Director di e pelicula ta satisfecho cu resultado y esaki ta afirma cu tin un plataforma solido pa stimula produccion cinematografico local . A confirma cu tin mas proyecto na caminda.
E pelicula tin un mescla di varios elemento di accion, drama y pasion, ta relata e historia di e traficacion di hende muhe, Soto ta indica cu den bida real esaki ta pasa y pa medio di e pelicula kier conscientisa e publico di e realidad aki.
