Den fin di siman tabata tin un caso caminda un capitan a ser rescata sano y salvo den e area di Refineria. E tabata biniendo Aruba y na dado momento pa un descuido a pega riba e isla dilanti refineria. Helicopter di Kustwacht y tambe Metal Shark a yega mesora pa yuda. Aunke a trata di ranca e boto, tog esaki no a logra e momento ey.
Algun compania local y donjonan di boto local a sera cabes pa purba bay yuda e capitan donjo di e zeilboot aki. No a logra tampoco. A bay trempan pasobra e lama tabata mas trankil. A lucha pa oranan largo y despues di merdia e lama a bira mas bruto y pesey mester a para e intentonan di saca e boto.
E problema ta cu e lama lo keda suta e boto y esey lo causa tambe cu e lo kibra pida pida of haya hopi danjo. Esnan cu a yuda tabata rumannan Dubero, Companianan Aqua Windies y tambe Trankilo Charters. Un boto priva di Bula Surf Shop tambe a duna un man. E trabounan aki tabata voluntario pa yuda otro cu a haya su mes den problema riba lama.
