Lucas Capitulo 12:25 ta bisa: “Cual di boso door di preocupa por añadi un cordon na su haltura.”
Den bida nos mester siña haci esfuerso, pasobra flohera no ta bin di Dios. Dios su palabra ta bisa nos pa esforsa nos mes, sea balente y no tene miedo ni tampoco cay flauw, pasobra Señor lo ta cu nos tur caminda cu nos bay.
Bijbel ta conta nos den Marco capitulo 2 tocante cuater amigo cu a tende cu Hesus ta den ciudad y a nan kier a hiba nan amigo paralitico p’e por ta sana. Pero ora nan a yega, e cas tabata yen yen di hende cu tabata haci e entrada dificil.
E cuater amigonan a dicidi di subi riba dak, habri un buraco y baha nan amigo paralitico net dilanti di Hesus, Hesus mirando e fe di e cuater amigonan a bisa e homber: “Bo picanan ta pordona.”
Y nos tur sa cu esun cu tin poder pa pordona pica ta Hesus Cristo y E mes tambe tin e poder pa sana tur malesa .
Pero e determinacion di e cuater amigonan tabata hopi grandi y nan esfuerso tabata excelente.
Pa di prome bo no ta tuma un curashi asina si bo no ta kere y bo mester sa sigur cu Hesus ta nos sanado, pa bo kibra un dak di cas cu no ta di bo, pa asina bo amigo por ta sana.
Hopi biaha hende ta campeon pa hiba otro bay trip, bebe, parandia. Pero pa hiba un amigo cas di Dios, eynan si nos ta pensa hopi.
A yega tempo pa nos esforsa pa hiba nos amigonan cas di Dios, pasobra eyden tin salbacion y sanacion. Y si e amigo tin cualkier problema matrimonial of den famia, Cristo Hesus tin e solucion.
Caminda nos haci esfuerso y dedicacion den sirbi Dios, milager ta sosode.
Salmo capitulo 31:24 ta bisa: “Sea fuerte y fortalece boso curason. Boso tur cu ta spera den Señor.”
2 Timoteo capitulo 2:1 ta bisa: “Abo anto, mi yiu, sea fuerte den e gracia cu ta den Cristo Hesus.”
Flohera ta hiba hende na pobresa. Hende floho no ta logra nada spiritual ni tampoco social, pasobra segun nan pensamento, ta cu tur esfuerso ta haci dolor y asina nan no ta mira e beneficio di esfuerso.
Pa bo drenta shelo bo mester haci esfuerso aki na mundo, mientras bo ta na bida. Den obediencia na Dios pa despues bo por ricibi e corona di bida.
E muhe cu tabata sufri pa 12 aña cu problema di sanger, a esforsa su mes den e multitud p’e por a mishi cu e zom di e bisti di Hesus.
Bartimeo mester a haci esfuerso y grita Hesus, aunke e multitud a hala su atencion, p’asina e por a haya su bista.
E centurion a haci un esfuerso di cana un dia largo, p’asina e por a busca Hesus pa sana su yiu.
Cual t’e esfuerso cu abo y bo famia mester haci pa asina mira milager di Dios sosode den boso hogar?
No tarda pa hacie.
Pastoor Marcel Balootje
