Melvin Ras, shopsteward di sindicato SEPPA na Guarda nos Costa a subraya awe cu no ta solamente nan como trahadonan ta afecta debi na e recorte salarial, sino nan famia na cas tambe. E sindicalista a corda tur hende, cu no mester enfoca solamente riba e ambtenaar, pero mester corda cu den mayoria caso nan ta e cabesnan di cas cu diripiente ta yega cu menos pa comparti cu casa, yiu y otronan cu ta biba bou di e mesun dak. Pesey a insisti awe cu nan kier pa gobierno stop mesora cu e recorte aki, pasobra a cumpli cu FASE te cu el a caba.
Un grupo di trahadonan di Guarda nos Costa a sali pafo awe na nan facilidad, situa na unda antes tabata Huis van Bewaring na Dakota. Ey nan a sali afo entre 11:00 am pa 12:00 pm, pa den un forma responsabel, garantisa un “minimale bezetting” den e facilidad, mientras cu e demas coleganan a para pafo solidario cu tur otro ambtenaarnan den accion awe.
Mescos cu tur otro departamento, Guarda nos Costa tambe a sinti e efectonan di recorte den nan operacion. Pero specialmente e trahadonan cu mester a entrega parti di salario y beneficio, mientras cu nan si mester a sigui traha normal pa garantisa siguridad, detene ilegalnan y percura pa nan deportacion for di nos isla.
Awe durante henter mainta y tambe lo sigui merdia, tin diferente accionnan tumando luga tur rond di nos isla memey di ambtenaarnan. Varios sindicato, entre otro SEPPA, a pidi nan miembronan pa demostra nan malcontento pa e decision di Gabinete Wever-Croes pa corta 12.6% for di salario y beneficionan di e empleadonan publico. E discusion a bira mas grandi despues cu gobierno a hustifica e medida aki como un forma solidario pa e empleado publico aporta na FASE, pa por duna tur cu a perde entrada den pandemia un sosten di 950 florin pa luna. Como cu gobierno a elimina e sosten aki luna pasa, e ambtenaar ta sinti cu ta hustifica pa kita e medida tambe.
