Lider di AVP, mr. Mike Eman a manda un carta pa Secretario di Estado pa Asuntonan di Reino, Raymond Knops, haciendo un apelacion urgente pa facilita Aruba cu mas vacuna. Na prome luga el a expresa di ta masha agradecido pa a laga Aruba participa den e strategia di vacunacion di Hulanda.
Asina mes e cantidad di pashent hospitalisa pa motibo di COVID-19 y tambe e casonan di morto relata na e virus, ta subi a base diario. Riba dje specialistanan ta indica cu e tratamentonan rutinario ta menos efectivo pa loke ta e variantenan nobo, e lider di AVP mr. Mike Eman a splica e mandatario Hulandes su preocupacion y di su partido den e carta.
Tambe Eman ta mustra cu mantene un meter y mey di distancia, bisti tapaboca y haci uzo di otro reglanan higienico manera laba man regularmente y uza desinfectante, ta mustra di no ta suficiente mas pa evita olanan nobo di e virus. Solamente un strategia pa vacuna lihe y den forma efectivo, por percura pa un recuperacion robusto di nos economia, e relacionnan social y salud publico, segun Eman a splica den e carta pa Knops. Sigur den un economia habri, cu contrario na Hulanda y otro paisnan dentro di Reino, ta depende riba un solo pilar, turismo, e ta urgente pa Aruba logra un porcentahe halto di ciudadanonan vacuna mas lihe posibel.
Loading…
Reload document 
Open in new tab Como un isla chikito, facilmente por ehecuta un strategia di vacunacion na gran escala y den termino corto y di e forma aki limita e cantidad di morto, contagio y e daño structural na nos economia, segun Eman a accentua den su corespondencia cu Secretario di Estado pa Asuntonan di Reino, Knops. Caida di turismo den un economia cu ta depende pa 80% di e pilar aki, ta hinca Aruba den un situacion financiero economico hopi malo.
Hopi empleado den e sector priva ta bibando pa mas di un aña caba di un entrada limita y ta depende di pakete di cuminda di Rode Kruis, ambos financia dor di Hulanda. “Nos kier salba Aruba for di e situacion aki mas lihe posibel y esey ta unicamente posibel cu vacunacion di nos comunidad completo” e ex-prome minister di Aruba, mr. Mike Eman a subraya.
Eman ta mustra cu internacionalmente a keda demostra cu un recuperacion economico y social ta relata directamente na un strategia di vacunacion unda den un tempo cortico ta vacuna mas tanto hende posibel. Ehempelnan exitoso ta Merca, Inglatera y Israel. Dor di e dependencia grandi di turismo, pa loke ta recuperacion economico di Aruba, un maneho efectivo y acelera di vacacunacion ta importante. E relacion di un strategia di vacunacion diseña pa Aruba, e recuperacion di nos economia ta evidente, mr. Mike Eman a sigura.
Pa medio di e carta aki Eman a haci un peticion riba e mandatario Hulandes, Raymond Knops, pa trata na move e gobierno di Aruba pa bin cu un maneho mas acelera di vacunacion, cu ta basa riba recuperacion di economia y turismo y percura pa mas hopi vacuna yega aki y mas lihe. Asina e recuperacion ta bay mas rapido, dor di cual e economia y finanzas publico por recupera.
