Parlamentario Eduard Pieters a comparti su experiencia despues di un bishita di trabou na Parlamento Europeo na Bruselas, describiendo e encuentro como un experiencia altamente productivo, educativo y importante pa e futuro di Aruba. Segun Pieters, e delegacion a haya oportunidad pa conoce mas cerca con Parlamento Europeo ta funciona y con ta tuma e decisionnan importante p’e paisnan Europeo.
Reunion constructivo cu Euro parlamentario
Un di e momentonan mas importante tabata e reunion cu Euro parlamentario Marit Maij, miembro di GroenLinks-Partij van de Arbeid. Segun Pieters, e combersacion tabata caracterisa pa un intercambio habri, constructivo y enfoca riba e oportunidadnan concreto pa Aruba.
Durante e encuentro, a trata diferente tema, incluyendo con Aruba y Union Europeo por fortalece nan relacionnan, mehora comunicacion mutuo y explora e oportunidadnan nobo di cooperacion.
Oportunidad pa Aruba
Un punto central di e reunion tabata e posibilidad pa Aruba sigui probecha y amplia e uzo di e fondonan Europeo. Pieters a destaca particularmente e programa Erasmus +, cu ya ta brindando e oportunidadnan importante pa e institucionnan educativo na Aruba.
Como ex-profesional den enseñansa, Pieters a expresa su satisfaccion con Aruba ta haciendo bon uzo di e posibilidadnan cu programa Erasmus + ta ofrece. Segun Pieters, e tipo di iniciativa aki no solamente ta beneficia e studiantenan y e docentenan, pero tambe ta contribui na e desaroyo mas amplio di comunidad Arubano.
Dialogo y cooperacion
Pieters a indica cu e reunion a permiti un intercambio valioso di informacion di ambos banda. Segun Pieters, e dialogo aki ta importante pa crea mas comprondemento mutuo y pa sigui identifica e oportunidadnan concreto cu por beneficia Aruba.
“Nos a intercambia bon informacion, pa nos por estrecha nos lasonnan y pa nos por sigui busca manera di mehora servicio y e oportunidadnan pa Aruba”, Pieters a comenta.
Un bishita educativo y productivo
A pesar di e agenda intenso y e distancia di e biahe, Pieters a conclui cu e experiencia na Bruselas tabata bale la pena. Segun Pieters, e encuentronan a aporta na conocemento valioso y a crea espacio pa sigui fortalece e relacionnan cu e institucionnan Europeo.
“Tabata un biahe largo, pero hopi productivo y hopi educativo. Como Parlamento, nos a haya oportunidad pa siña, comparti y traha riba e oportunidadnan cu por beneficia Aruba den futuro”, Pieters a conclui.
