Diamars Parlamento di Aruba lo bay trata e Propuesta di Ley (Wetsvoorstel Rijkswet Aruba Financieel Toezicht). Un topico cu Parlamento conoce caba.
Presidente di parlamento, mr. Edgard Vrolijk a indica cu ta trata mas bien di un reunion informal, unda cu Minister-President, mr. Evelyn Wever-Croes lo mester bin parlamento pa duna cuenta di kico e tin pensa di haci pa loke ta trata e ley aki. Si wak bek riba tur e transicion for di 2020 te cu 2023, nada a cambia. Parlamento ta mantene su posicion cu si nan ta ok cu supervision financiero, pero no na e manera cu Hulanda kier impone riba Aruba via un Rijkswet. Si tin un of otro parlamentario cu no ta di acuerdo cu esaki, e no ta na altura. Vrolijk a bisa cu diamars lo wak ki posicion lo tuma. “Echo ta, cu a fia un placa y esaki tin di pag’e bek,” e parlamentario a bisa.
A cuminsa e proceso aki pa pueblo compronde con henter e proceso aki ta hinca den otro. Conforme Statuut di articulo 36, Aruba a pidi yudansa na Hulanda despues di e pandemia. Hulanda a bay di acuerdo pero a pone dos condicion riba mesa cual tabata e Rijkswet: CAft y e COHO. Den e caso aki, e proceso a cuminsa cu Aruba a haya e placa for di Hulanda, pa asina yuda e economia di Aruba. Na november 2021 Prome Minister, mr. Evelyn Wever-Croes a firma cu e ta bay di acuerdo cu e Rijkswet.
Parlamento a duna su aprobacion na esaki, pero cu condicion cu e lo cana su caminda den Raad van State.
