Accion rapido di varios unidad di K9 durante persecucion den San Nicolas. Ta trata di un caso cu tin algun tempo andando. Den luna di juli a cuminsa un investigacion riba dos sospechoso cu tabata mobilisa den un tercel berde y cu lo tabata tin arma di candela den nan poder.
E movecion straño aki tabata tuma luga den Cayenastraat como tambe den area di Huliba Bar, cu ta caminda a logra e detencion di awe. Segun informacion cu a ricibi, e hoben aki lo ta di Rooiweg y tabata busca pa recherche di districto tres, cual ta San Nicolas.
E dia ey, a bay te su cas na Rooiweg pero e sospechoso a sali na careda y drenta mondi. Como cu e conoce e area bon, no a logra localis’e mas. A compronde cu nan tin di haber tambe cu ladronicia di cabrito.
E hoben Shannen Roch di 18 aña, a dicidi di core pa polis awe atrobe, esaki a pone nan mobilisa rapidamente su tras. Un rato despues a logra localis’e y deten’e.
Esaki a sosode den careda di 6:45 pm na altura di Huliba Bar den Weg Fontein, caminda a pone boei na man di e sospechoso en cuestion.
E hoben aki tin algun dia caba cu husticia ta buscando su paradero. Polis atento a cay riba dje den e area y a bay den su direccion, aunke el a purba core, esaki no a resulta.
A pidi transporte policial mientras su dos amiganan tabata bou grito y insulto den direccion di tur presente, como cu nan no tabata mucho contento cu e detencion. A hib’e warda di San Nicolas caminda e lo tin cu bay duna cuenta di e acusacion cu tin den su contra.
