Home » Economia di Aruba ta crece pero pueblo ta preocupa pa poder di compra

Economia di Aruba ta crece pero pueblo ta preocupa pa poder di compra

by Lis

Banco Central di Aruba (BCA) ta publica awe e “State of the Economy” pa e prome mita di 2026. E publicacion aki ta contene un analisis di desaroyonan nacional y internacional. E puntonan di mas clave ta presenta akibou.

E economia di Aruba a sigui crece den e prome mita di 2026, aunke na un ritmo mas suavisa. BCA ta calcula un crecemento di 3,5% den GDP real den e prome mita di 2026, mientras cu e crecemento pa henter aña tabata 6,3% na 2025 y 5,5% na 2024. Turismo a keda e motor principal, cu un aumento di 10,9% den bishitante “stay-over” y 11,2% den cantidad di anochinandi estadia, sosteni pa e mercado Argentino(+45,525; 181,6%)  y Mericano (+28,049; 4,9%). Sinembargo, gasto di turista pa anochi a mustra un aumento leve (0,7%), alcansando Afl. 563,1. Demanda domestico a keda resiliente, cu mas empleo, transaccionnan di pago, ingreso for di impuesto y credito na consumidor. Apesar di esaki, e confiansa di consumidor a baha pa motibo di preocupacion pa e poder di compra.

Presionnan inflacionario a aumenta den e prome mita di 2026. E inflacion basa riba un promedio di 12 luna a subi for di 0,1% na december 2025 pa 0,5% na juni 2026, mientras cu e inflacion midi na final di luna contra e mesun luna di e aña anterior a crece for di 0,4% pa 2,4%. E subida aki tabata principalmente relata na e prijs di combustibel mas halto, debi na e conflicto entre Merca y Iran. E reduccion temporal di accijns riba combustibel a mitiga parcialmente e impacto riba inflacion.

Pa locual ta transaccionnan entre Aruba y exterior, e cuenta coriente a registra un surplus di Afl. 685,4 miyon (2025: Afl. 708,9 miyon), sosteni pa turismo. Na fin di juni, e reservanan internacional a cubri 9,9 luna di pagonan di cuenta coriente den e balansa di pago (minimo recomenda: 3,0 luna). Ademas, indicadornan ta mustra cu e sistema financiero a keda solido.
Gobierno a registra un surplus fiscal di Afl. 238,1 miyon y e proporcion di debe compara cu GDP a baha na 62,9%. Tensionnan geopolitico, prijs di materia prima y fragmentacion comercial internacional ta keda riesgonan clave pa Aruba su economia cu ta depende di turismo y importacion.

E publicacion completo ta disponibel riba BCA su website: (https://www.cbaruba.org/document/state-of-the-economy).

Bo por gusta tambe

Adblock Detected

Please support us by disabling your AdBlocker extension from your browsers for our website.