Dunadonan di cuido a manda un carta pa Minister Presidente mr. Evelyn Wever-Croes, Minister Dangui Oduber, director di AZV, Parlamento di Aruba, Minister di Salud di Hulanda, Minister di Asuntonan di Reino Hulandes y e representacion di Hulanda na Aruba, relaciona cu e situacion financiero cu pais ta aden pa falta di un acuerdo cu Gobierno di Hulanda pa un fiansa. Nan situacion ta di tal indole cu si no haya placa urgente, henter e sistema di salud na Aruba lo “crash”.
E firmantenan di e carta ta Huisartsenvereniging Aruba (HAVA), Asociacion di Specialista d Hospital di Aruba (ASHA), Aruba Dental Association (ADA), Vereniging van Medisch Specialisten op Aruba (VMSA), Arubaanse Vereniging van Fysiotherapeuten (AVF), Botica Vereniging Aruba, Vereniging van Verloskundigen Aruba (VVA) y JP Visser Orthopedic Technical Center.
E dunadonan di cuido a corda Gobierno cu dor di e medida impone pa haya e di dos “tranche” di fiansa, AZV mester a corta 5 miyon florin pa luna den nan gastonan di operacion. Esey a traduci den un reduccion di 11% cuminsando for di luna di juli 2020 y lo sigui te cu december 2020. Nan ta teme cu e mesun areglo aki lo ta aplicabel den aña 2021 tambe, mirando desaroyonan rond di e virus.
Pero, locual sigur nan no a conta riba dje, ta e hecho cu fin di augustus, ora di paga, AZV a logra transferi solamente 75% di locual e tabata debe nan. Cu esey mesora e atraso den entrada a bira 31.2%. E dunadonan di cuido ta tuma Gobierno masha na malo den esaki pasobra nan a anuncia publicamente cu nan tin placa pa cubri te mita di september. Tambe a nota cu Ambtenaarnan si a cobra nan salario completo pero a opta pa corta den salud publico. Cu esey e dunadonan di cuido ta puntra nan mes unda e prioridad di Gobierno ta na e momento aki.
Bayendo atras cu riba 30% ta pone cu e dokternan, specialistanan, botica, Hospital y tur otro na dado momento no ta logra alcansa pa cubri nan gastonan regular pa mantene nan practicanan operacional. Cu e realidad aki awor riba mesa, nan ta adverti Gobierno cu si no haya un contesta positivo, cu nan lo tuma accion pa por garantisa nan entradanan y garantisa un nivel aceptabel di cuido na pashentnan.
Loading…
Reload document 
Open in new tab
Loading…
