Awel. Kico ta un capricho? Un capricho ta algo cu bo ta mara na dje y cu ta un cos cu aunke e ta perhudica bo mes of otro nan toch , bo ta pretende cu ta esey bo kier haci. Capricho ta cos cu por haci hopi daño, especialmente na famia.
Awor aki nos tin Covid-19, cuanto hende no a hanja e malesa aki rond mundo pa motibo di capricho. Bo ta tende no sali bay den multitud di hende, bisti mondkapje,cuidao cu cierto sitio nan cu bo ta bishita, etc pero ta mescos cu ta manda nan ta mandabo sali pa bo wordo contagia. Hopi hende sa masha bon cu ora bo ta frequenta cierto lugar bo chens di wordo contagia ta hopi grandi.Pero e capricho ta bisabo cu bo mester bay, mi mester sali tur weekend, mi mester bay casino, mi mester ta riba caya.
Capricho ta bisabo aunke tin toque de queda, abo ta invisible , polis no ta mirabo. Bo chick ta yamabo 11pm pa bo pasa serca dje sabiendo cu cu tin TDQ , y abo pa capricho ta sali toch. Tin hopi hende drumi den hospital pa motibo di capricho,tin hopi hende cu tin nan famia, ta pasando den momemto dificil pa motibo di capricho. Samson a perde su 2 wowo y su libertad, pa motibo di capricho pasobra e tabata sa cu e ta fout bezig, y hasta e Spirito di Dios a bandone, ora su passion y su capricho a domine.
Capricho y orguyo semper ta cana hunto y ta hiba na caida. Pero hopi nos ta haci duro hunga homber of hunga muher, sin wak ken nos ta perhudica. Tin biaha bo ta hanja un homber ta gasta tur placa cu muher di bida of cu byside mientras cu su famia ta sufri. Capricho di marca mayor. Tin biaha bo ta mira un muher ta manera un celebrity riba caya mientras e tin 2 yiu cu e mester cuida, y 10pm e ta presenta cu fastfood pa muchanan cu mester a come for di 6pm pa asina nan por drumi y lanta mainta pa bay scol.Tur esaki ta capricho pasobra mi mester tey asina e ta bisa.
Cuanto accidente no ta pasa cu hende caprichoso burachi , cu no por maneha nan auto, ni tampoco no ta laga otro hende maneha pa nan, cu tur consequencia teribel cu por tin. Awor cuanto mandatario no a sacrifica un pais pa motibo di un capricho politico.Pa un mentira cu nan mes no ta kere den dje, pero ta aplike riba e pueblo, basta nan keda den nan posicion,y na poder cuanto pais rond di nos no ta den situacion asina. Awor ora ta trata di Famia, nos ta mira cuanto matrimonio kibra pa motibo di capricho, cuanto mucha cu no tin nada den nan cabes pa motibo di nan mayornan su capricho, pa yega na divorcio, y despues e yiunan ta perhudica.
Cuanto hende no kier sali for di droga , pero pa motibo di capricho nan ta esclavo te awe. Cuanto mucha muher jong ta kere den un capricho, cu nan mester tin relacion cu un homber casa, sabiendo cu tur caminda e cos ey no tin futuro, y bo bida ta den ansha tur momento. Tin hopi cu nan capricho a produci malesa, Perdida di trabao, Perdida di Famia,y hasta Perdida di nan mes. Capricho ta pone cu hopi biaha hende ta wak den un solo direccion, y gran bendicion ta pasa otro banda.
Capricho ta pone bo priminti algo y ora bo no logra bo ta culpa otro hende, pasobra ta nan tin falta. Capricho ta yena bo boca cu mentira, y bo curazon cu maldad. No sea caprichoso, no hala henter bo famia den scuridad. Stima bo mes y stima bo famia, y bisa manera Josue ami y mi cas ta sirbi Dios. Josue 24:15. Aparta bo mes di tur capricho.
