Kynnia Sprok, docente di spaño y coordinado di siguridad di Colegio San Agustin San Nicolas, a anuncia cu mañan diaranson 2 di september scol ta habri oficialmente pa ricibi alumnonan di Colegio San Agustin y debi na tur e reglanan stipula door di DVG tin algun splicacion riba e procedura y asina tene tanto alumno como mayor informa corectamente.
Alumnonan di ciclo basico (Klas 1 y 2) mester ta presente na scol for di 7:45AM te cu 10:00AM. Ta coninua pa 10:15AM pa ricibi e grupo di ciclo avansa (klas 3 y 4) for di 10:15AM te cu 12:30PM.
E proceso nobo
Na yegada lo ricibi informacion di nan rooster, splicacion riba e sistena di 50/50 pa e aña escolar y con esaki ta bay. Sprock a duna un ehempel di kico esaki lo nifica ora menciona cu lo bin den simannan alterna. Tin klas di 28 alumno cu lo parti e klas den dos grupo consistiendo di 14 alumno cada un. Den prome siman grupo uno lo asisti na scol fisicamente mientras e siman siguiente nan lo keda cas y lo ricibi un pakete di cada les (materia) cu nan lo haci for di cas. Mientrastanto e siman ey, grupo dos lo ta fisicamente na scol pa asina consecutivamente e siman siguiente nan tambe keda cas cu tur material pa traha for di cas.
Un punto hopi importante cu kier enfatisa riba dje cu na momento cu alumno ta na cas e siman ey, cu no ta un siman liber, esaki ta algo cu tanto alumno como mayor tin cu pone bon atencion riba dje. Mirando cu nan a ricibi un pakete, cu tur informacion y les (tarea) necesario cu cada alumno mester finalisa/cumpli cu ne, na momento cu nan regresa e siman siguiente. Kico esaki kiermen? Cu ta exigi un tiki mas responsabilidad tanto di e alumno como tambe di e mayor su banda.
Medidanan di DVG
Algun di e medidadnan stipula pa DVG ta e mondkapje. Asina cu subi tereno di scol e mondkapje ta obligatorio. Scol a pone liña visibel di indicacion pa dirigi unda alumnonan tin di cana, tambe tin algun oficina cu ta permiti maximo un persona, tambe lo tin stickernan visibel cu informacion y/of indicacionnan riba reglanan di hygiena manera entre otro laba man como tambe den cada klas e uzo di handsanitizer. Tur esaki ta un esfuerso maximo pa mantene e bon salud di cada alumno como tambe di e docentenan di Colegio San Agustin.
