Awe den oranan di anochi, habitantenan di Parkietenbos, Buena Vista, Mahuma y Parkietenbos a activa mesora y tabata na susto debi na un candela grandi riba dump. Nan ta teme pa explosion, pa holo stinki of cualkier cos cu por sosode net den nan soño.
Cuerpo di Bombero sinembargo no por haci nada pasobra nan tin un protocol cu no ta subi eyriba pasobra ta haci daño na e vehiculonan di brandweer y e candela no ta paga nunca.
No mas cu siman pasa, Minister Ursell Arends, encarga cu maneho di naturalesa y medio ambiente a condena e cendemento di candela riba dump na Parkietenbos. El a hasta menciona di lo a entrega un keho na Ministerio Publico pa un of mas persona cu a cende candela eyriba. E mandatario a splica cu tin leynan cu ta prohibi pa cende candela, na unda cu ta. E no ta permiti y esun cu hacie toch, mester carga consecuencia.
Pakico un hende ta subi riba dump y cende na candela, no ta conoci. Pero hecho ta cu for di leu caba por a mira e vlamnan di candela riba dump, cu tabata bisto for di leu caba. Sea ta mira e candela mes of e huma preto cu tabata bayendo den halto.
Ta bon pa me menciona cu corte a dicta un sentencia cu cada bes cu tin candela eyriba, habitantenan ta bay cu un deurwaarder na e sitio pa constata cu tin candela. Asina cu esey sosode, cu su proces-verbaal ta manda cobra gobierno e suma di 5000 florin, cu mester bay como donacion na Rode Kruis. Minister Ursell Arends a confirma cu gobierno a paga 16 mil florin caba na multa.
E intencion no ta pa sigui paga asina, pesey kier tuma e asunto aki na serio y persigui esunnan cu ta hinca gobierno den debe innecesario. Ta corda tur hende, cu si haya bo ta cende candela eyriba, cu lo yama polis mesora y lo manda cobra bo e multa cu ta bin pa gobierno.
