Diasabra atardi rond di 4:00 pm, habitantenan den area di Lagoville a scucha un desordo di otro mundo. A resulta cu un persona tabata drift cu su auto den caya, poniendo trafico na peliger. Polis a ricibi varios yamada, pero e prome patruya a yega, e automobilista a core hinca su auto den cura. Esaki a sosode na Apachestraat 2.
Asina mes polis a pidi pa un takelwagen pasobra a confisca e auto. Pero e proceso no a bay facil. Habitantenan di e cas a bisa cu nan no kier presencia di polis, ni tampoco di prensa na nan cas. Durante su detencion, el a los y a tira algun mokete na e sitio, pa cual polis a deten’e mesora y a hinc’e den auto wardando nan bin busc’e pa transport’e pa ward’i polis.
Mientrastanto un ruman di e detenido tambe a yega y a laga sa bon rabia cu Polis no por drenta den cura sin aprobacion di fiscal. Den su rabia el a manda un boter di cerbes kibra riba asfalt y unda glas a spat tur caminda, incluyendo den direccion di e polis. Consecuentemente a detene e ruman tambe. Asina e driftmento a termina cu un auto den beslag y dos detencion, pa no sigui ordo di polis, pa trece trafico na peliger y pa maltrato.
