Despues cu tabata tin tur e problematica rond di mundo riba Zika y cu Aruba tambe a haya su golpi, pa e aña aki tur esfuerso cu Departamento di Salud Publico a haci, tabata fructifero, segun dr. Wilmer Salazar.
Masha poco caso a wordo presenta y tin te awor aki, bao di control, casonan di malesanan transmiti pa sangura. Esey mester mantene te hopi aña mas.
Pesey ta importante cu e temporada di yobida cu a cay, nos mester ta conciente riba e situacion cu no mester bin criadero. Nos no mester tin criadero na cas, pa evita broeimento di sangura, Aedes Aegypti, y cu lo por bin un epidemia un biaha mas di Zika, Dengue of Chikungunya.
Nos no mester lubida cu durante hopi tempo nos ta haya diferente infeccion di dengue pa diferente zero tipo, manera Dengue 1, Dengue 2, Dengue 3 y 4. Un di dos infeccion ta regarda pa complicacion, manera Dengue Hemoragico y Dengue Shock.
Nos no mester lubida cu morto a cay aki lamentablemente, pa motibo cu e persona a haya un di dos infeccion y a haya complicacionnan severo, te hasta morto.
Afortunadamente e aña aki, berdad cu nos ta bao di e nivel cu Organisacion Mundial di Salud ta bisa, pa casonan di malesanan transmiti door di vectornan, ta hopi abao, compara cu otro islanan, nos ta e prome isla cu a wanta duro riba esey y nos mester mantene asina.
Temporada di yobida a trece como consecuencia cantidad di criadero, na cas y cu nos mester lucha p’e. Awor aki, Departamento di Salud Publico, hunto cu Ministerio di Salud Publico y otro institucionnan di gobierno, manera DOW, Serlimar, semper nan ta premirando prome cu temporada di yobida ta bin, mantene tur su areanan seco di awa, pa awa no keda para, pa asina evita criadero. Y su resultado a bay hopi bon.
Awor ta keda di parti di comunidad, di parti di nos entidad, institucionnan, comercio, etc. mantene nos area liber di criadero di sangura.
E sintomanan
Nos mester corda cu si ta Dengue, Zika y Chikungunya en general, ta keintura. Dengue ta bin cu keintura hopi halto, dolor di weso, dolor di musculo, dolor patras di wowo, un rash y e ta bifacico.
Temperatura ta dura tres pa cuater dia 39 pa 40 grado, pero despues ta baha. Ora e baha, e por presenta cu un signo di alarma. E persona por sangra. E persona su cabes por draai, su presion ta keda hopi abao y lo por tin complicacion, pa por ten’e na tempo.
Despues di dos dia, e temperatura ta subi y despues e ta bay.
E rash, tambe ta aparece riba henter e curpa cu poco grawatamento.
Zika ta un malesa cu no ta duna mucho sintoma. Algun biaha, cu un tiki keintura, e wowo ta bira cora. No ta un wowitis, ni infeccion di wowo, e wowo no ta haci dolor. E wowo no ta saca awa, ni nada. Solamente ta un wowo cora y e rash. Ta trata aki di un rash cu ta aparece den cara y despues ta bay riba e pecho y despues full e curpa.
E lo por dura te mas of menos cinco pa seis dia.
Chikungunya ta un malesa cu ta duna keintura halto, dolor di curpa, rash y lo mas importante dolor di joints cu hopi biaha e persona no por cana y lo por tambe por tin su consecuencianan di un artritis cu por dura durante hopi tempo.
No mester lubida cu Zika, apesar cu e malesa ta asina suave, e tin complicacion. Pa un hende na estado, e por duna problema na su baby, manera Microcefalia of su cabes ta bira chikito cu problema di handicap mental y/of otro sintomanan, no solamente na mucha, pero tambe den adulto, of hobennan, ta e parti di Guillian-Barre, cu ta un sorto di problema imunologico cu ta afecta e sistema neurologico y e persona ta bira lam progresivamente.
E ta recuperabel si, pero ta un problema cu por causa morto, si e no wordo atendi na tempo.
