E proceso di elaboracion di e Plan Turistico di Saba 2023-2028 a cuminsa. Instituto Dick Pope Sr. di estudio turistico ta investigando e masterplan aki. Durante un prome sesion informativo, cu a tuma luga virtualmente, a duna tur stakeholder un update di e masterplan.
Durante dicho sesion, e presentadonan Dr. Robertico Croes di Aruba y Dr. Kelly Semrad, a aborda a motibonan pakico Saba mester un masterplan di turismo, ki tempo esaki lo cuminsa y caba, unda lo bay realisa e investigacion, ki enfoke lo bay uza durante esaki y con e stakeholders por contribui y participa den e proceso.
Desaroyo sostenibel
E masterplan di turismo di Saba ta necesario pa mantene un desaroyo turistico sostenibel. Obhetivo pa esaki ta pa aumenta e satisfaccion dje turistanan. Fuera di esaki, e lo señala n’e beneficionan economico y proteha e recursonan cultural y natural. Na october 2021 a realisa un investigacion chikito riba e estado di e sector turistico di Saba, cu a indica cu tin varios reto empresarial fundamental dentro di e sector.
A inicia e masterplan aki na februari y lo conclui esaki na augustus. E proceso lo encera bishita na Saba y St. Maarten, como centro di operacion principal di Saba, como tambe algun estudio, encuesta tocante Saba, Merca y Hulanda. Tambe lo bay tin un ‘exit-survey’ y un encuesta di calidad di bida.
Obhetivo general
Obhetivo general di e masterplan di turismo ta pa aborda e reto – y carencianan identifica. lo referi tambe na e forma con Saba por mehora su posicion competitivo den e region Caribense, aumenta e contribucion socioeconomic di turismo riba e isla, determina e posibel mercadonan di origen y riba cua publico mester dirigi.
E producto final lo provee un vision turistico di cinco aña pa e isla cu ta pretende di converti e sector den un motor economico cu lo beneficia e calidad di bida dje residentenan rib’e isla y na mes momento, preserva e sistemanan ecologico cu ta rondona esaki. Dr. Croes a bishita Saba recientemente pa reuni cu e director di turismo, Malinda Hassell, e comisario di turismo, Bruce Zagers, a consehero principal, Nicole Johnson y varios otro stakeholders.
Direccion strategico
Segun e director di turismo, Hassell, Saba a contrata un universidad di prestigio mundial y un ekipo di investigado pa desaroya e Masterplan di Turismo di Saba 2023-2028. “Ta necesario mantene un desaroyo turistico sostenibel…y construi un pilar turistico resistene. Por lo tanto, tin mester di un direccion strategico pa crea un vision di e direccion cu Saba mester tuma pa logra e progreso di e industria di turismo”, el a declara.
Beneficio pa un y tur
“Un masterplan di turismo cu tin como obhetivo aumenta e satisfaccion dje turistanan, e beneficionan economico y proteha e recursonan cultural y natural basico. Tambe lo construi nos industria turistico pa e ta mas strategico, resistente y por haci inversion SMART den e proximo añanan.”
Ta spera aporte y comentario di tur stakeholders y di henter e comunidad den e proceso, “ya cu e plan aki lo beneficia nos tur”, Hassell a declara.
Tocante Dr. Tico Croes
Robertico Croes ta traha pa Rosen College of Hsopitality Management na University of Central Florida, na Merca. El a studia “Public International Law” na Universidad di Bogota, na Colombia. Djey el a sigui den “International Political Decision-Making” na University of Southern California na Los Angeles, na Merca. Y por ultimo a logra su Ph.D den “Applied Economics” na University of Twente na Hulanda.
Tico Croes a traha y despues a hasta bira director di Departamento di Relacionnan Exterior di Gobierno di Aruba. Entre 1989 y 1994 e tabata miembro di Parlamento di Aruba, entre 1994 y 1998 e tabata Minister di Asuntonan Economico y di Turismo di Aruba. Entrte 1998 y 2001 e tabata Minister di Finansa y vice Minister Presidente di nos pais. Y for di 2018 te cu awe e ta profesor na universidad na Merca.
