Corte di Apelacion un biaha mas a sentencia dos Curasoleño na pena di morto na Maroco. Ambos ta habitante di Bijlmer na Amsterdam.
Shardyone Semeleer y Edwin Martina tur dos ta amigo di otro. A uzanan como sicario pa likida un rival di e Capo di Tuti di Capo, Ridouan Taghi. Pero pa nan malo a likida hende robes, pa colmo!
Ta pa prome biaha cu dos yiu di Corsou a ricibi un sentencia di pena di morto.
SENTENCIA
Tabata na 2017 cu Corte di Husticia di Maroco a condena e dos ciudadanonan Hulandes cu castigo di pena di morto pa e asesinato den e café La Crème na Marrakech. A contrata e dos hombernan, Shardyone S. (31) y Edwin (27) pa likida un enemigo di e capo Ridouan Taghi. Pero nan a tira hende robes mata, cu despues a resulta di tabata yiu homber di un hues Marocano. Nan a para riba nan inocencia y a apela e sentencia.
CASO
For di e investigacion di polis Marocano a resulta cu e criminal mas busca pa husticia Hulandes, Ridouan Taghi probablemente lo a duna ordo pa likida e doño Hulandes- Marocano di café La Créme, na Marrakkech. Door cu net prome cu a comete e acto, el a cambia di stoel, e dos sicarionan aki lo a tira yiu di un hues mata. Dos persona tambe a resulta herida.
Servicio di Inteligencia di Maroco, DGSN a bisa cu nan por a aresta nan lihe door di e declaracion di e testigonan cu lo a reconoce nan, door di nan aspecto Dominicano y Antiano, pa cual nan tabata resalta na Maroco.
MAROCO
Maroco ta un pais c’un monarkia na Noord-Afrika, na costa di lama Mediterano, cerca di Gibraltar y Ocean Atlantico. E ta frontera cu Algeria. A funda e Reino di Marueco despues cu e pais a declara su mes independiente di Francia y Spaña riba 2 di mart 1956. E ocupacion Spaño-Frances a cuminsa na 1912. Su capital ta Rabat y e ciudad mas grandi ta Casablanca. Otro ciudadnan important eta Fez, Marrakesh, Agadir, Tanger, Oudja y Nador.
Desde 23 di juli 1999 Mohammed VI ta Rey di Marueco y e ta di diesocho rey di e dinastia Alaoui cu desde 1666 ta goberna Marueco. E tin dos idioma oficial: Arabe y Bereber.
MAROCANO NA HULANDA
E comunidad Marocano-Hulandes pa loke ta grandura, despues di e comunidad di e Hulandesnan sin un background migratorio y e comunidad Turco-Hulandes, ta e mas grandi di Hulanda. Segun CBS, na 2022 tabata tin un mas o menos 420 mil Marocano biba na Hulanda, di cual mas o menos 60% ta naci na Hualnda. Gran parti di e Marocanonan na Hulanda ta procedente di Rif. Ademas di Marocano, nan ta considera nan mes tambe Berbero. E otro parti di e comunidad Marocano-Hulandes ta Berbero tambe, ya cu nan tabata e habitantenan original di Maroco.
