Diabierna atardi Polisnan a mobiliza basta pisa riba caminda principal di Playa pa San Nicolas. Nan tabata buscando un Hyundai HatchBack shinishi cu dos homber aden. Ta calcula e hombernan aki Venezolano.
E prome melding tabata papia di un atraco riba Do It Center na Savaneta. Polisnan a cuminsa busca riba e caminda direccion Playa pa e auto. Nan tabata sa cu ta un V-Wagen pero no tabata sa ki number e ta. Polis cu a yega na Do It Center Savaneta a tende cu e no tabata un atraco. Mas bien e dos hombernan aki tabata bin cumpra cosnan na cantidad grandi y asina tabata despista e cahera pa asina saca placa bek. Ora cu nan a caba na Do It Center Savaneta, a bay tambe na Do It Center Camacuri. Eynan si a logra reconocenan mesora y coy number di e V-Wagen.
Ora cu nan a bay paga na e cahera mesora a reconocenan y yama e manager. Asina tur informacion a wordo duna na Polis cu a topa cu e auto riba caminda. Refuerzo a yega rapidamente y asina a logra para e auto na altura di ATA. A blokia e auto V-3487 cu tres unidad.
E Polisnan di trafico y di Oranjestad a para e auto. A saca ambos sospechoso di e auto y separanan. Personal di atraco Team tambe a presenta y hefe di Atraco Team a atende cu ambos sospechoso. Despues a detene ambos y bay cu nan na Guarda Nos Costa pa asina mira nan status legal na Aruba.
Mirando cu tabata tin transmision live via FB a pone cu mas comerciante a core yama Polis. Nan a cuminsa na Macro na San Nicolas bin abou pasa Op Is Op y sigui bin na Do It Center Savaneta cu Camacuri. Djey nan careda a caba. No ta conoci si a logra den nan intentonan.
