Dia 10 di september proximo e aeropuerto di Saba, esta Juancho E. Irausquin Airport, lo cera pa un luna, pues te dia 8 di October. E motibo principal ta cu lo reemplasa e asfalt di e pista di aterisahe, pa beton. E trabounan a cuminsa for di simannan atras caba. A importa dos truck basta grandi y pisa, hunto cu nan chauffeurnan pa por transporta material di waf pa aeropuerto. Tambe a importa varios otro ekipo pisa, special pa por haci e trabou.
Hopi chauffeur a prefera di no topa cu e trucknan aki riba e camindanan smal di Saba, pero danki Dios no tabatin desgracia.
Gobierno a percura pa informa pueblo hopi adelanta pero toch aki aya por a scucha critica specialmente pasobra e temporada di cera e aeropuerto ta den ‘peak’ di temporada di horcan.
Si un hende mester biaha for di Saba of biaha pa Saba, nan lo mester scoge for di e 3 botonan disponibel. E prijs di ticket ta hopi atractivo. Normalmente e lo ta dobel e prijs. Parcr cu e companianan di boto ta haña subsidio den e temporada aki. Pa atrae turista, hotelnan tambe ta ofrece prijs hopi reduci.
Den caso di emergencia medico lo transporta pashentnan via helicopter. Normalmente esei tambe ta e caso ora tin un emergencia medico.
Si tur trabao sigi manera planea, dia 8 di October e aeropuerto di Saba lo ta operacional atrobe cu un pista di aterisahe nobo di beton.
