Ayeranochi den un ambiente festivo Impacto BV a anunsiá na su ofisina na Skalo ku for di dia 1 di yanüari e aña aki Laura Dirksz i Harry Allaart a bira sosio den e negoshi i ku a nombra nan komo Managing Director.
Despues di a finalisá su estudio di ‘bedrijfskunde’ na Universidat di Amsterdam, Laura Dirksz a regresá Kòrsou. Primeramente e tabata konektá na Impacto komo konsehero, pero despues el a bira Operations Manager i dia 1 di aprel 2019 a promov’é komo General Manager pa awor e bira sosio i Managing Director.
Esei ta konta tambe pa Harry Allaart ku a lanta na Kòrsou i ku for di aprel 2019 tabata Commercial Manager di e ‘Uitzendbureau’. Promé ku esei e tabata traha den sektor di hospitalidat den eksterior. Relashonnan duradero, transparensia i kresementu konhuntu ta gosa tur atenshon di dje. Na 1988 Anno Kibbelaar a lanta Impacto komo negoshi di famia huntu ku su yu hòmbernan Guido i Jeroen Kibbelaar. Den kurso di añanan esei a krese pa bira e kompania mas grandi di mediashon laboral i di limpiesa di Kòrsou ku na total 500 empleado. Ku e ekspanshon aki ku bista riba futuro Impacto ta keda aspirá pa duna servisio di kalidat haltu ku un aserkamentu personal.
For di e departamentu di Rekurso Humano lo pone un enfoke fuerte riba ‘Hospitalidat’, kaminda e trayektonan di siña-trahando lo respaldá tantu e sektor mes komo e merkado laboral. Impacto su sekshon di limpiesa ta keda enfoká riba efisiensia i servisionan spesialisá di limpiesa. E tim di kolaborador entusiasmá i ábil i un ret fuerte di sosio ta brinda un base pa servisio inovativo pa por sirbi tantu e aktual klientenan komo esnan di futuro. Aparte di servisio riba tereno di media pa trabou i limpiesa di ofisina, Impacto ta spesialisá tambe den reklutashon i selekshon, detashermentu, trayektonan pa hende kambia di trabou, limpiesa (i mantenshon) periódiko i entrega despues di konstrukshon.
