Diasabra den oranan di mainta a sosode un accidente riba e caminda di Professor Lorentzstraat cu Weststraat. Un auto color preto riba Weststraat a bay pasa e crusada sin para. Net un Sentra colo blauw shinishi tabata bayendo direccion pariba. E Spark preto a bay dal den banda di pasahero di e Sentra. Un dama sinta na banda den e Sentra a pasa den un susto mirando con un auto ta bin dal den su banda. Danki Dios nada malo a pasa cune. Polis di trafico a presenta. E chauffeur di e Sentra ta conta Polis cu ta dos homber tabata den e Spark preto. Nan a core bay. A mira cu nan ta Latino. Ora cu Polis tabata bezig a tende cu e dos hombernan a yega na e adres na Tanki Leendert unda e auto ta registra. Tambe e donjo lo a bisa cu e ta na caminda pa e sitio di e accidente. Ora el a yega a resulta cu e no ta donjo di e auto of e auto no ta riba su nomber. E auto ta riba nomber di un dama y ta un homber Latino a presenta pa busca e auto. El a bisa cu el a bin busca e auto pasobra e donjo mes ta afo di Aruba. Finalmente Polis a tuma e auto den beslag pasobra no por laga ken cu ta bay cu e auto. Polis di trafico a probecha mesora di bay na e adres na Tanki Leendert pa asina mira si por topa cu e donjo di e auto y asina aclarea algun cos relaciona cu e uso di e auto y ken ta para responsabel pa e accidente.
