Gobierno di Corsou ta pendiente pa algo importante pa su economia. Prome Minister Eugene Rugghenaath a menciona cu dos dock flotante cu a yega for di Hulanda, cu ta parti di e palabracionnan cu a cera cu Damen Schipyards, ora cu nan a tuma over e shipyard, cu nan lo a amplia e capacidad. E palabracion tabata pa un dock flotante, nan a bin cu dos.
Uno pa amplia e capacidad di drechamento di barco grandi y e otro pa duna servicio na barconan di trabao, manera Pilots, tugboats, etc, cu tambe nan tin den region pa haci servicio na Corsou.
Gobierno ta sumamente contento pasobra e ta mustra cu for di e colaboracion aki tin un expansion di actividad economico den haf. Ta spera tambe creacion di trabao y ta algo fenomenal.
E entrada di e dock flotante aki sigur tabata un bista hopi impresionante. Esaki, segun e prome minister, ta spera di ta un empuhe pa sigui busca colaboracion cu companianan renombra manera Damen, cual ta un compania di famia Hulandes. Ta kere tambe den propaga e oportunidadnan cu Corsou por ofrece na companianan den Reino Hulandes, tanto na Hulanda como tambe na Aruba, St. Maarten y Boneiro, cu por crea mas actividad economico na beneficio di e paisnan.
E tey pa keda
E compania cu a tuma over e waf, tey pa keda. E contract di lease ta 25 aña, pero ya caba nan ta bezig ta brainstorm riba potencial expansion na Bullenbaai. Pero tambe masha masha importante cu ta parti di e palabracion tambe pa e scol di capacitacion di hendenan local pa ta certifica cu habilidadnan tecnico, esey den colaboracion di otro companianan, manera Isla y Aqualectra, ta canando. E parti di e preparacion practico tecnico tambe ta canando cu ta masha importante cu por percura pa bo mesun hendenan por probecha di e oportunidad aki.
E prome minister ta masha contento cu tur cos a sigui segun palabracion. Esaki ta e prome pasonan cu por mira.
Interes
Tin hopi interes, segun e mandatario, cu locual a palabra tambe y pakico Damen. Damen ta yuda trece un cliente di calidad mas halto cu ta miho rendimento pa dock y un biaha mas, una bes bo logra un deal asina ey cu un compania asina, cu tin bon experiencia pa loke ta e facilitado cu gobierno a hunga, cu e tambe lo bisa otronan den e industria, cu wak Corsou, wak e haf, wak Reino parti Caribe, kico por haci. Minister Martina ta canando un trayecto pa yega na un masterplan pa desaroya un di e bendicionnan cu a haya di Dios, cual ta Bullenbaai, cu companianan manera Damen por establece eynan cu actividadnan portuario, pero tambe kisas cosnan di energia renobabel cu ta e industria di futuro.
