Diaranson merdia, un ex trahado di e Cas di Cuido Años Dorados a trece algun declaracion dilanti riba 24ora.com encuanto trato cu ancianonan ta ricibi na e Cas di Cuido aki. Den cuadro di esaki doño di e cas di cuido a reacciona.
El a comenta cu e dama cu a duna e declaracion, a yega cerca nan pidiendo trabou y a traha solamente 24 dia. “Ta trata di un dama hopi agresivo y nos a ripara cu na momento cu bis’e algo, e ta responde bek. Tin biaha ta yam’e, e ta bira cara, y e no tabata worry cu nada,” e doño Luz Sanchez a duna di conoce
Doño di cas di cuido ta reacciona riba ponencia di ex-empleado
Posted by 24ora on Wednesday, June 5, 2019
Dado momento mester a hala su atencion pasobra e tabata actua di un forma basta fresco. Ta manera cu cosnan cu mester bay manera e persona aki kier, cual no ta corecto pasobra ta regla di e Cas di Cuido mester wordo sigui.E cas actualmente cu tin capacidad pa 13 pashent, no tin mucho cliente. Nan tin clientenan cu ta warda espacio pa drenta un di e casnan di anciano di SABA. Esaki a causa cu nan cantidad di clientenan a baha pa 8 y a pidi e seora en cuestion si e por tuma e warda di 12 pa 8, cual el a nenga rotundamente di haci. E tabata kier a traha solamente 7 pa 3. “Pues e kier haci loke cu e kier, y no loke cu e doño di e Cas di Cuido dicidi.”
Tambe un aspecto fastioso ta cu e ex empleada aki tin un yiu cu e tabata kier bin traha cun’e. “Den un Cas di Cuido no por tin un mucha eynan.” Dia 24 di Mei tabata su ultimo dia na trabao. Prome cu e dia aki, e doño di cas a bis’e pa subi 12 pa 8, pero ainda ta insisti pa e traha e orario cu e kier, cual pruebanan e doño di cas tin archiva den su telefon. Cu 8 pashent pa lidia e cas, ta hopi dificil. Ora cu a bisa e dama esey, e no a gusta y el a manda algun mensahe masha grosero pa e doño di e cas.Señora Sanchez ta sinti hopi fastioso loke cu a pasa y ta bay busca ayudo di un Abogado, pasobra e ex empleado aki tin cu carga e consecuencianan di loke el a papia, dañando nomber di e Cas di Cuido. “E ta parce cu ta trata di un venganza personal cu e dama aki tin,” sra. Sanchez a bisa.
A dicidi pa bay un Abogado, pasobra e dama aki tin cu paga consecuencia pa loke el a haci.
Pa loke ta cashinan na lock, el a splica cu aki ta trata di cashinan di cuminda. Antes nan no tabata tin lock na e cashi di cuminda, pero tabatin camara poni. Normalmente ta haci compras pa henter un luna, pero a sosode varios biaha cu cuminda y hasta paña di pashentnan ta disparcena, pero tambe paña di cama, serbete, washandje. E ta algo cu ta pasa na diferente Cas di Cuido y e acto aki ta wordo cometi door di trahadonan mes pa cual a dicidi di pone lock tur caminda cu por.
Remedi
Pa loke ta trata remedi, botica mes ta parti esaki. For di tempo cu Inspectie a bin cu tur ley nobo referente Casnan di Cuido, nan a wordo informa cu nan no mag di tin remedi na e cas. Solamente Botica ta trece remedi, di henter un siman, cu ta wordo entrega na e cas semanalmente. E dama ta menciona di tratamento eynan, pasobra, recienemente a haya un pashent nobo, kende su famia a trece un saco yen di remedi, pero nan no a trece e indicacion y no por duna pashentnan nan remedi si no tin indicacion di dokter.
E remedi ta di cas y no por duna esaki pasobra no sa con pa duna nan. Loke mester a haci ta yama Botica y laga nan sa di esaki. Botica ta bin y nan ta drecha e remedinan, nan ta yama dokter y ta pone tur cos na su luga segun e indicacionnan di e remedi.El a splica tambe cu e tin bon contacto cu famia di e pashentnan, kendenan tur conoce. “Nan sa cu mi ta stima e grandinan,” Sanchez a bisa. Pa finalisa, el a bisa cu portanan di Años Dorados ta habri pa bin wak kico tur ta pasando eyden. No tin nada di sconde.
