Banco di Seguro Social (SVb) a finalisa cu e procedura di peticionnan pa subsidio di salario. Ta bay manda e pagonan den dos parti. Un parti a bay ayera y e otro parti ta bay otro siman.
Ir. Edwin Jacobs, director di SVb, a splica cu esnan cu a bini n a remarca pa subsidio di salario ta tur dunado di trabou registra na SVb. Esnan cu a registra despues di dia 15 di maart cu forsa retroactivo no a bini na remarca. A clasifica e dunadonan di trabou cu ta vulnerabel a base di COVID-19 y cu ta premira cu lo perde 25% of mas di nan entrada.
Pa e grupo cu no a bin na remarca pa subsidio di salario pasobra no a pasa e prueba di vulnerabel of perdida di 25%, lo haya un carta cu splicacion pakico nan no a bini na remarca. Abou ta splica tambe cu si e no ta di acuerdo, e tin 6 siman pa entrega obheccion na [email protected]. Un comision di evaluacion lo reevalua y lo conseha director di SVb. Si e conseho ta positivo, nan lo haya chens pa aplica bek.
Pa e grupo di dunado di trabou cu a bin na remarca pa subsidio di salario pero no a aplica, no a ricibi nada for di SVb. Si nan a aplica no work no pay den mei, nan mester a manda nan empleadonan pa e programa FASE. Pero nan tin chens pa aplica den luna di juni.
Esnan cu a bini na remarca pa e subsidio, nan lo haya un carta cu e suma di subsidio cu nan lo ricibi. Si nan no ta di acuerdo cu e suma ricibi, por manda obheccion na e mesun email ariba menciona. Ta haya un informacion tambe con a calcula e subsidio, y otro cu ta duna bista detaya pa e trahadonan cu nan a ricibi subsidio cu tur nan detayenan. Nan ta splica kico ta haya di subsidio pa salario (bruto) y kico nan ta haya pa paga e primanan di pensioen di trabou.
Si un trahado pidi pa haya bista di loke e haya di subsidio pa su salario for di SVb, e doño di trabou ta obliga pa mustra e empleado e documento aki, pero unicamente di e empleado y no di otronan.
Doño di trabou no por haya compensacion di trabou pa un empleado AO y subsidio di salario na mesun momento.
