Diahuebs atardi a manda yama e Director di Serlimar, Robin Ann L. Didder pa un reunion urgente na cede di Partido POR. Eynan a comunica cune cu, tin un investigacion contra dje relaciona su maneho y decisionnan na Serlimar, pa cua motibo a suspende mesora y prohibi’e di drenta oficinanan y edificionan di Serlimar tanten cu e investigacion ta andando. E decision aki a cay awe despues di algun siman caba di rumor cu su dianan na e compania di Gobierno ta conta.
Hunta di Supervision di Serlimar, cu tey pa representa Gobierno y controla gerencia di e compania ta di acuerdo cu e decision di Gobierno y ta hay’e hustifica. Un fuente a laga nos sa cu nan ta eyden pa sigura cu cosnan ta cana corecto, transparente y integro. Na momento cu no por garantisa e balornan ey mas, mester tuma tipo di decisionnan drastico asina.
Kico exactamente a sosode cu a conduci Gobierno na suspende un Director cu nan mes a apunta, no ta conoci ainda. Tin varios speculacion, pero ta opta pa spera riba un conferencia di prensa oficial di Minister Otmar Oduber pa splica kico su colega di partido a haci pa a suspende. Mientrastanto maneho di Serlimar ta keda temporalmente den man di e Director interino, Marelva Wever.
Precisamente na e momentonan aki Serlimar ta pasando dor di un cambio drastico. Gobierno ta implementando un plan ambicioso pa recogementony procesamento di sushi riba nos isla. Den e proceso a cera dump na Parkietenbos, ta cuminsa cobra cas y negoshinan pa recoge y procesa sushi y ta promove un maneho moderno, eficiente y sigur den procesamento di sushi via EcoGas. Serlimar lo mester evoluciona di un departamento di Gobierno cu ta core den perdida so, pa un compania Sui Generis bon para financieramente, cu un operacion eficiente y duradero.
Robin Ann Didder ta un maestra di scol y a opta pa subi lista di partido POR durante e ultimo eleccion. El a haya number 14 riba lista y a logra no mas cu 66 voto den eleccion na September 2017.
