Ta parce cu dialuna lo habri decisivo pa e funcion di Presidente di Parlamento, awo cu Mansur a pidi un reunion di Commissie Hushoudelijke Aangelegenheden (CHA). Eyden e lidernan di fraccion so ta sinta, hunto cu e dos miembronan independiente, e Presidente y e Griffier di Parlamento. Mansur kier midi si e dos fraccionnan cu ta forma coalicion ta sostene e funcion di Edgard Vrolijk ainda como Presidente di Parlamento. Parce cu e reunion lo tuma luga dialuna y ey Vrolijk lo haya su “reality check”!
Durante e reunion Vrolijk ta “call the bluff” pa mira si di berdad Misha Raymond y RAIZ lo kita nan sosten pa su funcion como presidente. Esey lo bira un “unicum” den historia parlamentario di nos pais. Nunca antes a yega di baha un presidente memey di su funcion, cu pa ley ta cuminsa y caba na september ora habri y cera e aña parlamentario. E regla ta papia con ta eligi un presidente pero no ta menciona mucho con ta bah’e.
Edgard Vrolijk no ta “popular”
Separa di e dos partidonan di coalicion (MEP-RAIZ), oposicion forma pa AVP, Accion 21, MAS, Parlamentario Independiente Gerlien Croes y Rycond Santos, constantemente nan ta pega cu Presidente mr. Edgard Vrolijk. E realidad ta cu hopi biaha e ta bruha den su rol di presidente, parlamentario di Fraccion di MEP y politico. Asina, en bes di inspira y tene e parlamentarionan hunto, den su forma di actua e ta afecta e relacion interno. P’esey awo, si acaso mester perde e confiansa di RAIZ, e ta keda cu 12 voto contra dje y solamente 9 na su fabor.
Etica democratico
Si Misha Raymond di berdad kita su sosten na Edgard Vrolijk durante e reunion cera di CHA, ainda nada no lo pasa. Ta djis cu e ora Vrolijk sa cu e no ta carga sosten mas di mayoria den parlamento y pa “etica democratico”, e lo mester “saca su conclusion”. Pero si e no haci esey, casi por spera un caso den corte pa laga hues dicidi. Di otro banda, e reglamento di ordo di Parlamento di Aruba ta uza democracia mayoritario como base, pues si e mayoria no kier bo, bo mester bay! Imagina nan yama un reunion publico y eyden check cuanto ta sostene e presidente y sali nuebe na fabor y 12 contra….ta un humiyacion total pa Edgard Vrolijk. Ta un estilo di keda manera un “campeon sin corona”.
Raiz: Problema ta den parlamento
Hendenan yega na Partido RAIZ ta menciona cu den combersacion cu e integrantenan prominente di e partido politico, a sigura cu e problema no ta den coalicion sino den parlamento. Cu e problema mas bien ta entre Misha Raymond y Edgard Vrolijk. Pero ta imposibel pa tin problema den parlamento entre dos fraccion den coalicion y e no ta crusa caminda yega na un falta di confiansa den Cocolishi.
MEP: Nos ta sostene Edgard Vrolijk
Contrario na Partido Raiz, cu a opta pa mantene silencio den e situacion, e partijraad di MEP si a sali mesora den siman y anuncia publicamente di ta sostene y ta para tras di Edgard Vrolijk y cu lo no doblega pa menasa di Misha Raymond. E mesun minister-president a opta pa bisti su pechi di Lider di MEP y a mete directamente den e conflicto cu tin den parlamento. Cu esey oficialmente MEP si a laga sa cu tin un conflicto den coalicion.
RAIZ: Nos no por controla Misha
Den un combersacion entre e ministernan den e coalicion, Ursell Arends lo a menciona di no kier baha e gobierno pero cu e no tin su parlamentario Misha Raymond bou di control. Cu esey Arends ta admiti e ora cu Raymond tin Parlamento y Conseho di Minister secuestra y nada lo no por sosode sin su sosten, sino e ta kita sosten na e coalicion y di biaha e gobierno mester bay cas.
Ley di matrimonio di mesun sexo por benta gobierno abou
No ta prome biaha cu e mesun ley aki ta causa problema den seno di partidonan politico. Den pasado MEP a pasa den un scual ora a trata e ley. E tempo ey Glenbert Croes como parlamentario a vota na fabor di e ley y despues di algun dia a sali afo y anuncia cu el a vota robes y e ta contra matrimonio di e mesun sexo. Claro cu loke e ta bisa den prensa no ta conta mas pa e votacion den parlamento. Den AVP tambe tabatin problema interno pasobra no ta tur hende ta na fabor. E ley aki ta causa divicion den pueblo, pero tambe den e partidonan politico tradicional. Asina awo aki no por papia di un unanimidad den e dos partidonan mas grandi. Ta obvio cu den ambos partido e voto pro y contra e ley ta bastante dividi.
Pero pa e coalicion aki tambe ta mesun cos. Mientras RAIZ ta totalmente na fabor di e ley, den MEP tin por lo menos cinco di e nuebe parlamentarionan cu no ta na fabor. Pues, cu si yama e reunion mes, e chens ta grandi cu e ley lo no pasa. Raiz no tin problema cu esey tampoco, pero ta sinti cu pueblo tin derecho di sa cua politico ta na fabor y cua ta contra, ya por dicidi den futuro pa ken e voto lo bay y pa kende no.
MEP lo acepta humiyacion di Raiz?
Ya caba, pa e tono di bos cu a uza den e carta contra Edgard Vrolijk, ya MEP ta sinti cu Raiz a pasa liña caba. Si den un reunion di CHA nan kita sosten na Vrolijk y despues den un reunion publico tambe, lo traduci den un conflicto mucho mas grandi. Pasobra e ora ey Raiz no ta cumpli mas cu e acuerdo di palabracion politico di cua partido tin presidencia di parlamento y cua tin vice-presidencia. Y na momento cu falta na cumplimento, di mes cu no tin sentido pa sigui mas padilanti cu otro.
Politica ta hopi instabil awo
Conocedonan di e materia ta cataloga e situacion awo como uno instabil. No por yama un reunion publico pasobra no sa ki direccion e lo tuma pasobra coalicion no ta riba e mesun liña. Pa colmo, siman pasa Alvin Molina a biaha tambe, cu a causa cu no por a yama ningun reunion, pa falta di quorum. Y tanten cu no soluciona e tema di e ley pa permiti matrimonio di mesun sexo, ta mustra cu e situacion lo keda mesun cos.
Raiz: Tanten no atende e ley, no conta cu nos
Aunke cu dirigencia di Partido RAIZ ta keto pa algun dia caba, for di e fuentenan den e partido ta saliendo mensahenan den direccion cu tanten no atende e ley di matrimonio di mesun sexo, cu no por conta riba sosten di Raiz pa nada otro. Bisando esey, tin tur indicacion cu Misha Raymond ta “lock” Parlamento di Aruba pasobra no por trata ningun otro ley tampoco.
Si warda poco mas corte mes lo kibra e impasse
Esey ta loke probablemente Partido MEP kier pero Raiz di otro banda no kier laga cinco hues sinta den nan stoel y nan mes kier tuma e decision den parlamento. MEP sinembargo, pa miedo di perde voto di su achterban, ta prefera no vota riba e ley y asina keda bon cu ambos banda di e bataya, tanto esnan contra e ley y esnan pro e ley. Echo ta cu na luna di mei proximo, Corte di Casacion a keda di tuma un decision riba e caso cu e gobierno di coalicion MEP-RAIZ a apela na Hulanda. Gobierno a perde e caso na Aruba y den Corte Comun di Caribe Hulandes pero asina mes a apela te na Den Haag. Ta opta pa laga e cinco huesnan ey dididi pa mira kico lo sosode, en bes di vota den Parlamento di Aruba y para tras di e voto tambe.
Siman Santo = Siman Decisivo
E siman aki, aunke e ta siman santo den religion Catolico, toch pa politica e lo bira un siman decisivo. E bala por bay tur banda na e momento aki. Cu Minister Geoffrey Wever y Minister Glenbert Croes regresando di biahe, ya caba Minister Rocco Tjon a sali pa un biahe na Hulanda. Pues Conseho di Minister mes no ta completo na e momentonan aki, mientras cu Parlamento normal tin “reces” hunto cu e vakantie di scol. Asina mes dialuna a yana reunion di e comision cu ta atende cu e ley di matrimonio di mesun sexo pa midi con leu nan ta y cuanto mas lo falta prome cu e ley ta cla pa su tratamento den un reunion publico (OV Klaar). Pero si tin parlamentario for di Aruba, tampoco lo por trat’e, mustrando asina cu ta keda rek e tempo mas posibel.
MEP ta na punto di faya den su di dos coalicion
Ta parce cu coalicion cu MEP no ta bay bon nunca. Mayoria biaha, hasta den pasado tempo di Nel Oduber, cada biaha e gobierno ta cay. Di otro banda, den e historia moderno di Evelyn Wever-Croes, cu a hereda e partido despues di dos gobernacion solido di 12 y 11 asiento di MEP so y AVP di 12 y 13 asiento nan so…awo ta den un dilema cu coalicion. Na ambos ocasion, Gobernador di Aruba a boga pa crea un base amplio, pero na ambos ocasion a scoge pa un mayoria limita. Den e prome salida a forma cu POR y RED pa 12 asiento pero e coalicion a cay net seis luna prome cu eleccion. MEP, POR y RED a bay atras den voto, pero a core forma un coalicion atrobe pero e biaha aki cu RAIZ cu apenas 11 asiento. Tur experto di politica por a bisa bo cu esey ta sumamente peligroso, specialmente si nota con pueblo ta pensa awendia di politica general y specialmente esun tradicionalista.
Coalicion of mandato amplio
Si MEP ta hay’e dos biaha tras di otro den problema cu su “junior partners”, anto lo mester analisa unda e problema ta. Kisas ta MEP mes? Of kisas partido chikito ta demanda y presiona mucho y haci gobernacion imposibel? Ta un spiel cu ambos partido mester wak nan mes aden y contesta nan mes. Berdad ta cu ambos scenario tin su “pro” y su “contra”. Pa un motibo cu pueblo a brinda MEP e sosten dos biaha sigui pa e purba drecha Aruba despues cu semper nos a conoce coalicion, desde aña 1986 bin ariba. Ora MEP a faya pueblo, a dicidi di duna AVP un chens pa hacie miho den ocho aña. Tampoco no a bay bon y a termina cu dos minister condena, demostrando falta di maneho y control interno. A duna MEP un chens atrobe den coalicion y awo nan tin dos minister acusa di corupcion wardando nan caso bin padilanti mientras un parlamentario di coalicion a ricibi condena caba. Awo MEP ta den su di dos periodo y ya tin un minister caba sospechoso, den e caso aki nan Minister Plenipotenciario, pendiente tratamento di nan caso. Pues cu ki cara e partidonan tradicional por bay pidi pueblo sosten pa dirigi e pais aki atrobe? Anto pa colmo cu e mesun integrantenan.
Pueblo ta demandando cambio
Si tuma nota di e sentimiento di pueblo, entre otro riba rednan social, por deduci cu mayoria kier mira algo diferente, cara nobo, maneho nobo, bin cu ideanan “out of the box” en bes di mantene e mesun politica tradicional di “friends & family” y di enrikecimento propio di e mandatarionan. Ministerio Publico tambe ta riba un racha di persecucion di e politiconan corupto, den un esfuerso pa purba inspira y guia nan den e direccion corecto, pero sin mucho resultado. Ora MEP a gosa cu e dolornan di AVP, awo nan ta den mesun boto of kisas hasta pio. E berdad ta cu si nos sigui haci cosnan mescos, nos lo sigui haya e mesun resultadonan. Mester haci cosnan diferente si kier un cambio berdadero.
Tocante Edgard Vrolijk
Na aña 2000 el a termina su estudio na nivel HBO como maestro di scol specialisa den educacion di studiante entre 6 pa 12 aña. Na aña 2012 el a logra e titulo di Bachelor in Law y na aña 2021 el a obtene esun di Meester in Rechten. El a drenta arena politico na aña 2013 obteniendo 586 voto na su nomber. Na aña 2017, el a crece y yega 749 voto. Den ultimo eleccion el a logra 619 voto, cu ta representa un caida di 17%.
Tocante Misha Raymond
Raymicheline Manuela Jurienne (Misha) Raymond a nace na aña 1981 na Philipsburg, Sint Maarten. E ta psicologo y politico. Desde 17 di september 2021 e ta miembro di Parlamento di Aruba y alabes lider di Fraccion di RAIZ. Durante su prome salida den politica, na aña 2021, el a logra un total di 693 voto. Misha Raymond ta yiu di Desiree Correa, educador y autor di buki.
Misha a termina su estudio secundario na Colegio Arubano. El a sigui studia na Hulanda, obteniendo su bachelor y master den psicologia clinico na Universidad di Leiden. Mas despues e ta certifica como psicologo infantil y hubenil y como systeem therapeut. Na momento cu el a bin bek Aruba, Misha Raymond a cuminsa su carera profesional na Fundacion Respaldo.
