Un di e kehonan tambe cu Departamento di Impuesto ta scucha, ta cu e cliente ta bisa cu el a haci su pago na tempo, pero toch ta haya un naheffing.
A haci e pago prome cu dia 15. Esey, ora cu ta bay wak mas leu, ta ripara cu e cliente, enbes cu el a paga riba Februari 2018, el a paga riba Januari 2018. E ora eynan e sistema no ta bay wak cu Februari tin un pago cu a drenta, vocero di Departamento di Impuesto, Meverly Romano a splica.
Esey ta haci cu e cliente ta bay haya un naheffing pa Februari. Hopi biaha ta trata di loke e persona mes, vooral e ta pasa ora cu e personanan haci pagonan online via nan banco, cual ta recomenda esaki.
Pero pagonan online tambe mester drenta cu e detayenan rekeri. E cliente hopi biaha e ta yena nomber di su empresa fout. E no ta duna persoonsnummer, of e ta menciona e periodo robes. Asina cu bo ta haya cu tipo di cosnan asina ta causa cu e pago, ora cu tin cu registr’e riba e periodo corecto, riba e nomber di e cliente corecto, no por, pasobra e no ta menciona e datonan corectamente.
Esey ta causa cu e cliente por a ricibi un naheffingsaanslag tambe awor aki. Loke cu Departamento di Impuesto ta recomenda e clientenan, y esaki ta algo cu lo bay conta for di awo p’adilanti hopi fuerte, ta porfabor, tene cuenta cu dia 15 ta e deadline. Ora cu ta menciona riba e declaracion cu e deadline ta dia 16, hopi biaha ta pasobra cu dia 15 a cay den fin di siman of riba un dia di fiesta.
Den un caso asina, e ora e deadline ta schuif, e ta bira e siguiente dia di trabao. Pero normalmente, den un situacion asina, 15 ta deadline y dia 15 ta realmente e deadline pa entrega e formulario di declaracion y tambe pa haci e pago corespondiente.
Si e cliente ta declara cu e tin cu paga 2000, pero el a paga 1000 so, e ta bay haya un naheffing pa e diferencia cu e no a paga. Cualkier detaye cu e cliente no cumpli cun’e, e lo causa un naheffing.
Pakico awor aki e naheffingnan aki ta sali den cantidad grandi, pasobra awor aki tin’e completamente automatisa. Esey ta nifica cu antes e tabata sosode manualmente. Awor aki e sistema, manera cu mira dia 15 a pasa y e aangifte no a drenta of e pago no a drenta, e naheffingsaanslag ta sali.
E ta bay keda conta pa tur e tipo di belastingnan aki, cual ta wordo yama e aangiftebelasting. Esaki ta un eyeopener pa tur empresario, pa nan tene cuenta cu e fechanan final. E vervaldatum, cu ta menciona riba e cobransa. Claro, si tin un cobrans cu den nan opinion ta bisa cu e no ta hustifica, e ta haci uso di su derecho e ora ey pa entrega un carta di obhecion, camind e ta splica pakico e ta pensa cu e cobransa no ta hustifica y cu e ta haya no na su luga.
E por entrega un carta di bezwaar y Departamento di Impuesto lo tum’e den tratamento y lo evalua e situacion y mira si berdaderamente e cliente tin rason. Si e tin rason, lo mester baha e suma di e cobransa, segun Romano. Tur esey ta posibel.
Pa awor aki, tur persona, cu nan sa cu nunca nan a cumpli cu entregamento di nan declaracion of nan no tabata haciendo e pago na tempo of nan a haci e pago, pero no completo. Tur esey ta bay genera p’e despues un naheffingsaanslag. Esey ta algo cu kier pidi tur cliente di Departamento di Impuesto pa tene cuenta cu esey.
Un naheffings aanslag no lo bay sali sin boet. Un naheffingsaanslag semper ta sali cu boet. Den caso di Declaracion, ora cu un cliente no haci un declaracion, e prome biaha so e ta haya un carta di advertencia. Si e di dos biaha, si e ta den incumplimento, e ta bay haya e ora un boet di 125 florin.
Si despues e siguiente luna, ainda e no a entrega su aangifte, e 125 ta bira 250 florin. Ley ta permiti Departamento di Impuesto continua cu e boet, segun maneho di boet, pasobra cu Departamento di Impuesto tin un boetebeleid den e casonan aki y esaki no ta algo cu ta desconoci pa clientenan.
E boetebeleid ta publica riba nan website. E clientenan di Departamento di Impuesto y tur otro hende tin acceso na esey, cu nan ta wak cu si na momento cu nan ta den incumplimento, kico ta e boet cu nan por spera.
Ta algo cu ta hopi importante pa tur cliente ta conciente di dje, cu tanto e declaracion como e pago ta importante pa e drenta na tempo.
Esnan cu ta paga via banco, mester tene cuenta cu ta e dia cu e placa wordo registra riba cuenta di Departamento di impuesto, ta e dia ey ta esun determinante pa e departamento.
Si e pago a wordo haci dia 15 na banco, pero banco a pas’e riba nan cuenta riba dia 16, ya caba e ora e cliente ta laat, segun Meverly Romano.
