Aña 2019 tabata un aña cu hopi reto den operacion diario di Departamento di Impuesto (DIMP). Segun directora Luenne Pieters, DIMP tabata tin un presupuesto aproba pa Parlamento y ta mara na cierto acuerdonan cu tin cu CFT.
E presupuesto aki a wordo stipula na 845.2 miyon florin pa loke ta entrada di impuesto. Manera cu semper ta menciona, DIMP t’ey pa garantisa cobransa di impuesto pero tambe pa facilita e contribuyente pa cumpli cu su debernan fiscal.
Ta cobra no solamente impuesto, sino tambe erfpacht, leges pa DIMAS, SVB premies, AZV Premies, y toeristenheffing cu ta bay specificamente pa ATA Sui Generis. Esaki tambe ta forma parti di e pakete di trabao di DIMAS. Den su totalidad por bisa, ora ta trata entrada, DIMP ta basta satisfecho, caminda cu a caba di cera luna di december. Ta den e trayecto final pa raporta esaki na minister, Directie Financien y tambe CFT, caminda cu por ta satisfecho cu a logra e metanan stipula pa loke ta entrada.
Durante aña 2019 tabata tin diferente otro proyecto cu DIMP tabata encarga cun’e, cu a pone como meta. A cuminsa na 2019 implementando un reforma fiscal, e prome fase. A tuma luga diferente cambio riba tereno di grondbelasting por ehempel, tarifanan cu a cambia, belasting vrijvoet cu a keda elimina. Tambe a introduci un aangifteplicht pa loke ta grondbelasting.
Aña 2019 pa loke ta grondbelasting, tabata uno transitorio. Por a mira si cu entrada di grondbelasting no a resulta manera cu a premira. Esaki tin di haber cu diferente bezwaarschrift cu a wordo entrega di contribuyentenan cu no ta di acuerdo cu nan cobransa.
Nan a sa di cana nan caminda y tin algun caso cu ta na corte pa asina ey tin un siguransa di interpretacion di e ley di grondbelasting. Fuera di grondbelasting tabata tin diferente cambio riba tereno di inkomstenbelasting cu a toca den e reforma fiscal number 1.
