E accidente cu a sosode dialuna un poco despues di mey anochi, no ta e prome cu a sosode na e mesun sitio. E ta e di dos accidente na e mesun sitio den tres luna di tempo.
For di despues di e accidente a cuminsa cu investigacion di con esaki a sosode. E auto aki, Nissan March color biña scur, tabata bahando di pariba y bayendo direccion di rotonde di ex Drive In. No tabatin ningun otro vehiculo mas envolvi.
Tin dos hipotesis. Uno cu door di velocidad halto, e chauffeur a perde control net despues di e birada yegando e brug y a cay despues di a dal den e vangrail. E di dos posibilidad ta cu e chauffeur, door di velocidad of no, net despues di e birada a core mucho na su man robes pa cual el a dal den e cero di santo, cu ta separa e vianan. E impacto a causa cu el a perde control y a bay na e otro banda di caminda, di e vangrail. Riba e muraya di e brug por mira cu e Nissan a dal den esaki tambe, ya cu tin un marca di verf eyriba.
E siguiente pregunta ta si e impacto contra e muraya a causa cu el a bons dal den vangrail pa cay abou na final, of net lo contrario. Por mira rastro di brake cu aparentemente ta indica cu e lo a dal den vangrail, kibra esaki, bay dal den muraya di e brug y djey a cay den un profundidad di mas o menos 20 meter.
Loke por bisa cu siguransa ta cu e tabata dobel impacto, vangrail y pia di e brug y cu e ocupantenan tabatin hopi suerte, pasobra e auto tabata uno chikito. Tur e sla tabata den e parti dilanti di e vehiculo, ora cu el a dal ariba y e resto di slanan a bini cu e caida.
Esaki tabata e di dos accidente na e mesun sitio, esun anterior tabata na luna di october, ora cu di e mesun forma un vehiculo a cay den profundidad, rancando e vangrail y tur bay abou.
Dia 3 di januari tambe tabatin un accidente pero esaki ta di un vehiculo cu a dal den vangrail y a keda di banda riba e caminda.
Segun un experto consulta, e vangrailnan aki no ta adecuado pa e area halto aki. Por uz’e riba careteranan plat. Si kier evita mantene e vehiculo riba e caretera, pa e no cay den abismo, mester un otro tipo di barera, tanto na cuminsamento como na final di e arco grandi di e brug.
E caminda grandi aki, for di rotonde di Pos Chiquiot te rotonde di Drive In, a keda cera pa basta ora, causando un trafico pega den tur e vianan alternativo (caminda bieu y esun di Franse Pas).
Accidente
Tabata dialuna pa casi 1’or di marduga por a scucha hopi alarma bahando for di San Nicolas y di Playa, tanto Polis como Ambulance. Un biaha mas a resulta cu un accidente a tuma luga riba e brug Gobernador Fredis Refunjol di Green Corridor. Varios Polis, Ambulance y Materialenwagen a yega rapidamente.
Den e accidente aki tabatin dos persona herida, un homber (chauffeur) y un señora. Nan no tabata pega den e auto, pa cual por a saca nan basta lihe y transporta nan pa hospital, despues di a stabilisa nan. Tabatin hopi Bombero na e sitio cu a logra haci e trabou di rescate na e pia abou di e brug hopi mas rapido.
