Rafael Garcia ta un studiante na Mon Plaisir College y ta participando den Arte di Palabra. E ta conta cu esaki ta su di cinco aña compitiendo. E ta un competencia super dushi, conociendo hobennan nobo y ta mira tambe e talento cu nan tin.
Su meta pa ta den Arte di Palabra no ta pa simplemente gana, sino trece mensahenan na nos comunidad, mirando cu esaki ta un oportunidad pa trece un mensahe. E competencia lo tuma luga diasabra. Garcia ta splica cu e mes no ta prepara pe. E ta haya esaki un reto pa siña e proximo dianan.
Pero cu apoyo di su famia y amigonan, e lo logra e reto aki.Garcia a splica cu Arte di Palabra lo tuma luga den Cas di Cultura di 6’or di atardi pa 9’or di anochi. E ta invita henter pueblo di Aruba pa bin apoya nos hobennan, bin apoya nos lenga materno Papiamento y tambe apoya nos hubentud. Entrada ta gratis. Tur hende por bin. Ganado di aña pasa, Shaniqua Jones, studiante di John Wesley College, a splica cu e feeling tabata hopi great, pasobra e poema di dje “E mensahe” tabata con bida ta birando den e temporada aki y kico tur ta pasando rond di nos, cu hopi hende no ta observa. Shaniqua a observa esaki y a skirbi’e y a bin cu un poema basta fuerte y sali na prome luga.
E experiencia tabata hopi grandi y leuk, pasobra dos aña pasa e tambe a participa den Arte di Palabra Aruba y a biaha bay Corsou y a cay den finalista. E aña aki ta bay ta un otro experiencia p’e, pasobra su poema tambe ta bin duro y cu un mensahe hopi profundo. Shaniqua a splica cu tin mucha cu ta pasando den hopi cos y nan no tin un manera pa expresa nan mes. Por ta nan ta pensa cu hende no lo compronde nan y e tin un conseho. Arte di Palabra ta e miho manera pa expresa nan mes. No solamente cu bo ta haya un chens pa bo splica bo sentimento, pero tambe e publico ta compronde y apoyabo sumamente grandi. Si hobennan tin problema, si tin pensa di saca nos papiamento padilanti, mustra con importante e ta y kico tur por haci cun’e, por bin Arte di Palabra.
