Uni na e di 19 aña di peregrinacion y Caminda di Cruz den oranan di anochi y marduga contemplando bida, pasion y morto di Señor Hesus. E peregrinonan ta cana 11 km den pasonan trankilo pa biba e experencia unico cu cada edicion ta laga graba den curason di cada peregrino.
Durante e peregrinacion tin un Cruz di luz cu ta recorda cu Hesus ta E luz den scuridad. Cada aña ta enfoca riba un tema. Pa e aña aki, ta fiha riba “Hesus mi ta kere den Bo”. E ser humano ta pasa den diferente situacion cada dia. Na momento cu ta kere y confia Cristo Hesus, ta sinti e presencia di Hesus cerca. Esaki ta haci cu e ser humano por enfrenta retonan di bida cu forsa divino. Un mensahe profundo di speransa pa comunidad.
Yega misa La Birgen di Fatima Diahuebs Santo prome cu 11:30 pm pa participa na peregrinacion 2024. Trece Rosario, boter di awa y foks/ flashlight. Durante e ruta tin un mini bus patras cu por uza pa descansa (si ta necesario ) un rato y despues pa sigui cana. Tin toilet durante henter e ruta. Ora caba cu e Caminda di Cruz na Kapel di Alto Vista, tin bus di Arubus na pia di sero pa transporta e personanan cu no tin transporte, bek pa misa La Birgen di Fatima na Dakota.
Ruta:
Ruta: Mispelstraat, Macubaristraat, Scopapelstraat, Caya Betico Croes, Cayena Mall bai na man drechi. Morocho Seroe Blanco, bai man robes. Prome caya di di asfalt bai na man drechi. Sigui stret pasa Roti Center (Tanki Leendert). Yega retonde Tanki Leendert, sigui stret den direccion pa bai Catiri , Moko,Calbas. Na Kudawecha snack ta bai na man drechi pa yega Kapel di Alto Vista.
E peregrinonan ta yega na pia di sero di Kapel di Alto Vista pa rond 3or di marduga. For di eynan ta sigui cu e oracionnan di Caminda di Cruz for di e prome stashi. Ta resa e oracionnan for di buki biña di Pastoor Daniel Wieslaw Szpila.
Pa mas informacion por contact e coordinadornan Vanessa Croes na 733-0505 of Noraida Carolina Croes na 594-8042. Pasobra Dios a stima mundo asina tanto, cu El a duna Su unico Yiu, pa tur esunnan cu kere den dje no bay perdi, m’a haya bida eterno (Huan 3:16).
