Luna di april ta scogi como Luna Nacional di Prevencion y Conscientisacion di Abuso di Mucha. Pa esaki Fundacion Mi Voz Ta Bo Voz, Comision Nacional di Abuso Sexual di Mucha y Bureau Sostenemi a uni pa trece conscientisacion riba esaki. Nan ta organisa charla pa trece informacion. Pero tambe ta pidi pa bisti color blauw diabierna awo.
Lisette Gomes, presidente di Fundacion Mi Voz Ta Bo Voz, a splica cu nan a scoge e fecha aki pa motibo cu tabatin vakantie di scol, mirando cu e muchanan ta bek na scol. Nan ta pidi comunidad di Aruba, e scol- y negoshinan pa bisti na blauw. Esaki ta algo simbolico cu ta representa e color di conscientisacion pa abuso di mucho, e ribbon ta blauw.
E color por ta cualkier blauw y p’esey no mester cumpra algo special. Fundacion Mi Voz Ta Bo Voz ta pidi pa tur hende saca un selfie y pone esaki riba Facebook, unda por hashtag e fundacion. Tambe por manda e selfie via e number di WhatsApp 5629820. Esunnan cu kier haya mas informacion por bay riba e pagina di Facebook di e fundacion.
Nan kier p’esaki bira algo di tur aña, unda ta bisti na blauw. Asina ey ta laga e muchanan haci pregunta dicon ta bisti e color ey, unda por yega n’e muchanan y laga nan haci pregunta di kico ta abuso y con pa stop esaki.
Gomes a splica cu diahuebs nan ta cuminsa cu e prome charla. Pero pa henter luna di april nan ta bay tin pa motibo di e decreto cu esaki ta Luna di Prevencion y Conscientisacion di Abuso di Mucha. E fundacion hunto cu Comision Nacional di Abuso Sexual di Mucha y gobierno a organisa cuater charla den e luna aki. E prome charla ta diahuebs y lo ta teni na Noord. Nan ta invita comunidad di Aruba pa presenta p’asina scucha y compronde e consecuencia- y traumanan cu abuso di mucha ta haci cu e muchanan.
Magaly Maduro, director di Bureau Sostenemi, a expresa cu nan ta sumamente contento cu e colaboracion cu e Fundacion Mi Voz Ta Bo Voz. Hopi mas fundacion y departamento di gobierno door cu a decreta e luna aki como luna contra abuso di menor a uni forsa, y bisa cu nan no ta acepta esaki. Pero no solamente e luna di april, pero henter e aña. Cada dia di aña, esta 365 dia, mester corda cu e muchanan ta sagrado. No mester mishi cu nan na ningun manera.
El a sigui bisa cu riba tur diahuebs y un diamars di e luna aki, desde diahuebs, tin charla na MFA. E fechanan ta dia 11, 18, 25 y 30 di april. E di dos charla ta tuma luga na Paradera, despues na Santa Cruz y ta caba na Savaneta. Ta invita tur hende, no solamente Rubiano ni habla Hispano, pero henter comunidad pa ta presente y educa nan mes.
Pa mas lesa TREMPAN.COM.
