Diabierna awo den oranan di mainta Corte den Prome Instancia cu ta atende casonan penal ta bay trata un caso basta interesante. Ta trata di personanan cu a menasa Prome Minister di Aruba. Menasa un mandatario den funcion ta un crimen y husticia ta persigui esunnan cu haci nan mes culpabel na e practica aki, den un esfuerso pa destabilisa orden publico y stroba un minister pa por eherce su trabou trankil.
E acusadonan ta John Andil Amador Bridgewater; Joelynn Aranxta Gonzalez y Lydien Adriana Terisa Martha. E acusacion contra nan ta di a menasa Prome Minister riba 29 di december 2020. Y ta acusa Martha di a menasa Prome Minister cu morto riba dia 29 di december 2020.
Extra vigilancia di polis durante grabacion di mensahe di fin di aña di minister-president
Por corda ainda cu riba 29 di december, aña pasa, ora di grabamento di mensahe di fin di aña dilanti sede di Gobierno, tabatin extra vigilancia. A haya masha straño cu ta cera caminda pa un grabacion. Un fotografo di gobierno a acerca 24ora.com e tempo ey bisando cu minister-president ta riba un “high alert” debi na menasa di morto cu e mandatario a ricibi den su direccion. Segun e fotografo, polis a conseh’e pa tin extra vigilancia.
Por a tuma nota di varios team special di Polis den cercania, manera e Rapid Response Team, VIP Team di Polis, K9 Unit y te hasta e propio altocomisario Vanessa Kock tabata presente pa e grabacion. E caminda a keda no menos di 45 minuut cera, djey trafico por a sigui normal bek.
Ta sospecha cu e menasanan aki tabatin di haber cu Toque de Queda, cu na momento di su introduccion e tempo ey a causa opinionnan mixto.
Polisnan special cuidando cas di minister-president, debi na menasa di morto. 
Polisnan tabata cuid’e henter anochi, durante lunanan largo
Tocante Evelyn Wever-Croes
Evelyna Christina “Evelyn” Wever-Croes, un hurista y fiscalista, ta naci dia 5 di december 1966. E ta casa cu Kenneth Wever desde aña 1991 y ta mama di Claudine Wever, Christine Wever y Kevin Wever y ta wela di Trystan Wever. Desde 17 di november 2017 el a asumi e puesto di Minister Presidente di nos pais. El a bira e prome hende muhe pa encabesa gobernacion di pais Aruba, despues di Henny Eman, Nel Oduber y Mike Eman. Dia 20 di september 2021, el a huramenta pa di dos biaha den e funcion di minister-president, e biaha aki pa Gabinete Wever-Croes II den un coalicion entre MEP (9) y Raiz (2).
Evelyn Wever-Croes a participa den eleccion pa prome bes pa Partido Movimiento Electoral di Pueblo (MEP) na aña 2009 riba number 3 di e lista y a logra 1621 voto. Na aña 2011 el a asumi liderazgo di e partido cu su mesun omo a funda na 1971 y a bira e prome lider femenino di e partido, despues di defunto Betico Croes y Nel Oduber. Como lider den eleccion na aña 2013 el a logra 3396 voto individual, den e eleccion na September 2017, aunke e partido a bay dilanti cu 2 asiento, toch e votonan individual no a aumenta tanto, pero tabata bon pa 3503 voto riba nomber di Evelyn Wever, cu ta representa un aumento di 3.15%. Den e ultimo eleccion, Evelyn Wever-Croes a kibra su mesun record di voto, ora el a redobla su votonan personal y a yega 7518 voto riba su nomber!
mr. Evelyn Wever-Croes a studia ley na Universidad di Antias na aña 1985. Despues el a sigui pa Leiden, Hulanda, unda el a studia ley fiscal (Belastingrecht) te cu aña 1989. El a traha como Inspector di Impuesto di Aruba entre 1989 y 2003, trahando bou Gobierno di AVP y MEP. Wever-Croes a opta pa sigui su carera profesional como abogado y alabes fiscalista na e oficina di abogadonan Croes, Wever & Tchong desde aña 2003 pa 2010, ora cu el a dedica completamente na politica.
