E prome Dia Internacional di Mama Tera tabata na 1970. No a stipula e fecha di 22 di april pa e keda na un dia celebra so, sino pa e bira un movemento pa e medio ambiente. Awe ta recorda cu 51 aña pasa a marca e dia special aki pa inspira conscientisacion, proteccion y aprecio pa mundo su naturalesa y medio ambiente. Directie Natuur en Milieu (D.N.M.) kier a uni na e movemento aki y asina yuda cu conscientisacion riba diferente tema.
E organisacion Earthday.org ta e organisacion mundial mas grandi pa e movemento pa nos medio ambiente. E mision di e organisacion aki ta pa diversifica, educa, y activa mundialmente, trahando cu mas di 750,000 partner den 192 pais pa crea democracia medio ambiental. Ta referi na e actividad rond di e dia aki como e actividad social mas grandi na unda 1 biyon di hende ta participa anualmente. E aña aki ta e di dos biaha cu ta organis’e na un forma virtual, unda cu lo tin 3 dia di evento virtual. Riba dia 20 a cuminsa cu e activistanan hoben manera Gretha Thunberg cu mensahe pa humanidad.
Tambe tabata tin un evento di e organisacion HIPHOPcaucus. Riba dia 21 lo tin riba e plataforma diferente actividad pa educador riba e temanan relaciona cu medio ambiente. Riba dia 22 mes lo tin e evento digital, unda cu lo tin tayer, discusion di diferente panelista y presentacion special cu ta enfoca riba e tema pa e aña aki Restore Our Earth™. Lo amplia e tema pa trata diferente topico manera: tecnologia pa restaura clima, esfuerso pa planta mata den, e.o., mondi y jungle, agricultura regenerativo, husticia pa igualdad y medio ambiente, como tambe ciencia humano. E aña aki tambe e actividadnan di Earth Day ta cana paralel cu e Global Climate Summit di Merca di e organiza pa e gobierno Mericano. Esaki tambe ta un paso prometedor mundialmente pa reunion global pa e esfuersonan pa nos medio ambiente. Earth Day 2021 lo ta Live y lo stream tur actividad riba e plataforma: https://www.earthday.org/earth-day-2021/
Kico ABO por haci pa dia di MamaTera?
Uni na e movemento. Subi algun website y informa bo mes kico ta e temanan di importancia, comparti esakinan riba bo rednan social cu otro. Haci contacto cu esnan cu ta profila nan mes den e tereno aki y debati riba e situacion di e medio ambiente local, reuza material, haci un compromiso pa reduci e uzo di energia y mas importante ta duna bo contribucion na planta un mata y cuid’e. Siña nos muchanan stima y respeta nos medio ambiente y nos naturalesa. Si cada persona haci algo chikito lo yuda pa e lidernan local of mundial tuma decisión importante pa yuda nos planeta.
Historia di Dia di MamaTera
E idea di Dia di Mama Tera tabata un iniciativa di senador di Merca di Wisconsin, Sr. Gaylord Nelson, kende na 1970, despues di tabata testigo di un ‘oil spil’ grandi na California y inspira pa e movemento antiguera, a realisa cu su persona hunto cu conscientisacion publico di e efectonan di polucion di aire, awa y tera lo por yuda pone e tema di proteccion di medio ambiente riba e agenda politico. E prome Earth Day a yuda e introduccion di United States Environmental Protection Agency (US EPA) y a logra di tin ley pa aire limpi, awa limpi y bestia protegi.
D.N.M. ta invita un y tur pa join den e movemento y check e website di earthday.org pa e actividadnan creativo y kico tur abo por haci na cas pa yuda restaura Mama Tera y haci un diferencia e Dia di Mama Tera aki.
