Dia 5 di maart di september awor lo cuminsa e workshop “desaroya bo propio pelicula” di Rebecca Roos.
Bo tin un idea pa un pelicula, un short film, un documentario of un webserie?
Durante 9 sesion den 3 siman lo siña converti bo idea den un proyecto cu su propio project file, presupuesto preliminario y un bon pitch.
Na final di e tayer, lo presenta bo idea na un panel di profesionalnan cu ta liga na organisacionnan cu ta co-financia y subsidia proyectonan asina. Asina cada participante ta haya feedback hopi valioso for di diferente punto di bista.
Entre 5 y 21 di maart, tur diamars, diaranson y diahuebs anochi di 6:30 PM pa 9:30 PM tin un encuentro na Museo Arqueologico Nacional Aruba, na Playa. Lo atende tur aspecto cu ta esencial pa concretisa un idea den un bon proyecto: investigacion, con ta skirbi un script, con bo estilo creativo ta relaciona cu produccion y post-produccion, kico bo mester pa haci e paso di desaroyo pa produccion mes y financiamento.
Pa registra por yena e formulario na https://forms.gle/ikSA2aFMjbMvdGPg6
No mester di bo propio ekipo pa participa na e tayer. Ekipo di produccion for di camara te cu computer ta disponibel pa uzo durante e tayernan manera ta considera necesario.
Rebecca Roos ta organisando tayernan riba nivel halto pa tur esunnan cu ta interesa den desaroya nan conocemento di produccionnan audiovisual. Mas tanto Rebecca sa haci esaki internacionalmente pero desde 2023 aki a cuminsa cu un serie di tayer na Aruba.
E prome tawata uno intensivo dedica na produccion di documentario. Como resultado di e tayer tres ekipo di participante di edad varia, cada un a produci un documentario cortico cu pronto lo estrena durante un festival di cine. Aña pasa tambe a duna e tayer “desaroya bo propio pelicula” y por lo menos un proyecto ta den desaroyo activo y lo drenta pre-produccion pronto.
Rebecca Roos Productions ta organisa e tayernan aki cu e infrastructura di e Cinema Education & Research Foundation, un fundacion cu lo lanta e aña aki y cu ta dedica na eleva e nivel di e sector audiovisual na Aruba. E fundacion ta curasha tur tipo di produccion audiovisual, no unicamente loke ta trata e estilo y genero, sea ficcion of documental, pero tambe e topiconan cu ta relevante pa nos comunidad.
